ഡെബിയന്‍ 10 ബസ്റ്ററില്‍ വേര്‍ഡ്പ്രസ്സും ദ്രുപലും ഇന്‍സ്റ്റാള്‍ ചെയ്ത വിധം

സ്വതന്ത്ര സോഫ്റ്റ്‌വെയര്‍ ലോകത്തു് ലഭ്യമായ രണ്ടു പ്രധാനപ്പെട്ട കണ്ടെന്റ് മാനേജ്‌മെന്റ് സിസ്റ്റങ്ങളാണു് വേര്‍ഡ്പ്രസ്സ്, ദ്രുപല്‍ എന്നിവ. നിരവധി വെബ്ബ്സൈറ്റുകളും ബ്ലോഗുകളും ഇവയുപയോഗിച്ചു് നിരന്തരം സൃഷ്ടിക്കപ്പെട്ടു കൊണ്ടിരിക്കുന്നു. ഇവ രണ്ടും ഇവയുടെ ഡവലപ്പര്‍മാര്‍ ക്രമേണ മെച്ചപ്പെടുത്തി വരുന്നുമുണ്ടു്. വേര്‍ഡ്പ്രസ്സ് ഉപയോഗിക്കുന്നതു് താരതമ്യേന ലളിതമാണു്, ദ്രുപല്‍ അത്ര സിമ്പിളല്ലെങ്കിലും പവര്‍ഫുള്ളാണു്, വേര്‍ഡ്പ്രസ്സിനേക്കാള്‍. ഈ ബ്ലോഗ് വേര്‍ഡ്പ്രസ്സിലാണു് ക്രമീകരിച്ചിട്ടുള്ളതു്. ‍ഇക്കഴിഞ്ഞ ദിവസം കുറച്ചു സമയം ഫ്രീയായി കിട്ടിയപ്പോള്‍ ലാപ്‌ടോപ്പിലെ ഡെബിയന്‍ 10 ബസ്റ്ററില്‍ വേര്‍ഡ്പ്രസ്സും ദ്രുപലും ഇന്‍സ്റ്റാള്‍ ചെയ്തു.‍ വേര്‍ഡ്പ്രസ്സ് ഇന്‍സ്റ്റാള്‍ ചെയ്യാന്‍ ഡെബിയന്‍ 10നു വേണ്ട ട്യൂട്ടോറിയലുകള്‍ വെബ്ബില്‍ ലഭ്യമാണു്. എന്നാല്‍ ദ്രുപല്‍ ഇന്‍സ്റ്റാള്‍ ചെയ്യാന്‍ ഡെബിയന്‍ 10നു വേണ്ട ട്യൂട്ടോറിയലുകള്‍ തിരഞ്ഞിട്ടു കണ്ടു കിട്ടിയില്ല. അതു കൊണ്ടു് ഡെബിയന്‍ 9 നു് വേണ്ടി ലഭ്യമായ ട്യൂട്ടോറിയലാണു് നോക്കിയതു്. കണ്ണികള്‍ അവസാനം കൊടുത്തിട്ടുണ്ടു്. ചെയ്ത‍ രീതി താഴെ:-

വേര്‍ഡ്പ്രസ്സ്

കണ്ടെന്റ് മാനേജ്‌മെന്റ് സിസ്റ്റങ്ങള്‍ വെബ്ബ് അപ്ലിക്കേഷനുകളായതിനാല്‍ അവ സ്ഥാപിക്കുന്നതിനു് ഒരു നല്ല വെബ്ബ് സെര്‍വ്വര്‍ ആദ്യമേ ഇന്‍സ്റ്റാള്‍ ചെയ്തിരിക്കണം.‍ ഇവിടെ തെരഞ്ഞെടുത്തിരിക്കുന്നതു് അപ്പാഷെയാണു്. ആദ്യമായി അപ്പാഷെ 2, പി എച്ച് പി തുടങ്ങിയവ താഴെ കൊടുത്ത കമാന്‍ഡ് കൊടുത്തു് ഇന്‍സ്റ്റാള്‍ ചെയ്തു.

$ sudo apt install apache2 php7.3 libapache2-mod-php7.3 php7.3-common php7.3-mbstring php7.3-xmlrpc php7.3-soap php7.3-gd php7.3-xml php7.3-intl php7.3-mysql php7.3-cli php7.3-ldap php7.3-zip php7.3-curl

അപ്പാഷെ പ്രവര്‍ത്തിക്കുന്നുണ്ടോയെന്നു് നോക്കി.

apache_test

അതു് ഓക്കേയാണു്. ഇനി പി എച്ച് പിയും വെബ് സെര്‍വ്വറും പ്രവര്‍ത്തിക്കുന്നുണ്ടോയെന്നു് നോക്കണം. ഇതിനായി താഴെപ്പറയുന്ന കമാന്‍ഡ് കൊടുത്തു് test.php എന്നൊരു ഫയലുണ്ടാക്കി.

$ sudo nano /var/www/html/test.php

എന്നിട്ടു് ‌താഴെപ്പറയുന്ന കോഡ് അതില്‍ ചേര്‍ത്തു.


<?php
phpinfo();
?>


എന്നിട്ടു് save ചെയ്തു. അതിനു ശേഷം ബ്രൌസറെടുത്തു് താഴെക്കൊടുത്ത കണ്ണി അഡ്രസ് ബാറി‍‍ല്‍ കൊടുത്തു് റിസള്‍ട്ട് കിട്ടുന്നുണ്ടോയെന്നു് നോക്കി.

http://localhost/test.php

താഴെ കാണുന്ന ഔട്ട്പുട്ട് കിട്ടി.

php_test

ഇനി വേണ്ടതു് ഡാറ്റാബേസാണു്. മരിയഡിബിയാണു് ഡെബിയനിലെ ഡിഫാള്‍ട്ട്. താഴെക്കൊടുത്ത കമാന്‍ഡുകളുപയോഗിച്ചു് മരിയഡിബി ഇന്‍സ്റ്റാള്‍ ചെയ്തു:

$ sudo apt install default-mysql-server

$ sudo mysql_secure_installation

ഇന്‍സ്റ്റാളറിന്റെ എല്ലാ ചോദ്യങ്ങള്‍ക്കും Y എന്നുത്തരം കൊടുത്തു.

തുടര്‍ന്നു് താഴെ കൊടുത്ത കമാന്‍ഡ് പ്രകാരം മരിയഡിബിയില്‍ പ്രവേശിച്ചു, പാസ്സ്‌വേര്‍ഡ് കൊടുത്തു:

$ sudo mysql -u root -p


Enter password:
Welcome to the MariaDB monitor. Commands end with ; or \g.
Your MariaDB connection id is 39
Server version: 10.3.17-MariaDB-0+deb10u1 Debian 10

Copyright (c) 2000, 2018, Oracle, MariaDB Corporation Ab and others.


മരിയ ഡിബിയുടെ പ്രോംപ്റ്റ് കിട്ടിയപ്പോള്‍ താഴെ ചേര്‍ത്ത പ്രകാരം കമാന്‍ഡുകള്‍ കൊടുത്തു് വേര്‍ഡ്പ്രസ്സിനായി ഡാറ്റാബേസ് നിര്‍മ്മിച്ചു:

MariaDB [(none)]> CREATE DATABASE wordpress;

MariaDB [(none)]> GRANT ALL PRIVILEGES on wordpress.* TO ‘wordpress_user’@’localhost’IDENTIFIED BY ‘wordpress_pss123’;

MariaDB [(none)]> FLUSH PRIVILEGES;

എന്നിട്ടു് മരിയഡിബിയില്‍ നിന്നും പുറത്തു കടന്നു.

MariaDB [(none)]> EXIT;

ഇനി വേര്‍ഡ്പ്രസ്സ് ഇന്‍സ്റ്റാളേഷനാണു്. ഇതിനായി /tmp/ ഫോള്‍ഡറില്‍ പ്രവേശിച്ചു:

$ cd /tmp/

എന്നിട്ടു് വേര്‍ഡ്പ്രസ്സിന്റെ ലേറ്റസ്റ്റ് വേര്‍ഷന്‍ ഡൌണ്‍ലോഡ് ചെയ്തു.

$ wget -c https://wordpress.org/latest.tar.gz

എന്നിട്ടു് താഴെ ചേര്‍ത്ത പ്രകാരം ആ ടാര്‍ബാളിനെ അഴിച്ചെടുത്തു് /var/www/html/ ഫോള്‍ഡറില്‍ സ്ഥാപിച്ചു.

$ tar -zxvf latest.tar.gz

$ sudo mv wordpress/ /var/www/html/

എന്നിട്ടു് താഴെ ചേര്‍ത്ത പ്രകാരം അതിന്റെ ഓണര്‍ഷിപ്പ് മാറ്റി.

$ sudo chown -R www-data:www-data /var/www/html/wordpress/

താഴെ ചേര്‍ത്ത പ്രകാരം മോഡ് മാറ്റി.

$ sudo chmod 755 -R /var/www/html/wordpress/

ഇനി താഴെക്കൊടുത്ത കമാന്‍ഡ് ഉപയോഗിച്ചു് അപ്പാഷെയിലെ /etc/apache2/sites-available/ ഫോള്‍ഡറില്‍ വേര്‍ഡ്പ്രസ്സിന്റെ കോണ്‍ഫിഗറേഷന്‍ ഫയല്‍ സൃഷ്ടിച്ചു.

$ sudo nano /etc/apache2/sites-available/wordpress.conf

അതില്‍ താഴെക്കൊടുത്ത വരികള്‍ ചേര്‍ത്തു സേവ് ചെയ്തു:


<VirtualHost *:80>
ServerAdmin admin@localhost.localdomain
DocumentRoot /var/www/html/wordpress
ServerName localhost.localdomain

<Directory /var/www/html/wordpress>
Options FollowSymlinks
AllowOverride All
Require all granted
</Directory>

ErrorLog ${APACHE_LOG_DIR}/localhost.localdomain_error.log
CustomLog ${APACHE_LOG_DIR}/localhost.localdomain_access.log combined

</VirtualHost>


എന്നിട്ടു് അതിന്റെ /etc/apache2/sites-enabled/ ഫോള്‍ഡറില്‍ അതിന്റെ കണ്ണി സൃഷ്ടിച്ചു.

$ sudo ln -s /etc/apache2/sites-available/wordpress.conf /etc/apache2/sites-enabled/wordpress.conf

വിര്‍ച്ച്വല്‍ ഹോസ്റ്റും അപ്പാഷെയുടെ rewrite മൊഡ്യൂളും‍ enable ചെയ്തു:

$ sudo a2enmod rewrite

തുടര്‍ന്നു് അപ്പാഷെ റീസ്റ്റാര്‍ട്ട് ചെയ്തു.

$ sudo systemctl restart apache2

എന്നിട്ടു് ബ്രൌസറില്‍ ലോക്കല്‍ ഹോസ്റ്റിലെ വേര്‍ഡ്പ്രസ്സ് അഡ്രസ്സ് കൊടുത്തപ്പോള്‍ വേര്‍ഡ്പ്രസ്സിന്റെ ഇന്‍സ്റ്റാളര്‍ പ്രവര്‍ത്തിച്ചു.

http://localhost/wordpress/

2019-09-01 15-34-22_1

അതില്‍ നേരത്തേ വേര്‍ഡ്പ്രസ്സിനായി മരിയഡിബിയില്‍ സൃഷ്ടിച്ച ഡാറ്റാബേസും അതിലെ യൂസര്‍നെയിമും പാസ്‌വേര്‍ഡും കൊടുത്തു വേര്‍ഡ്പ്രസ്സ് ഇന്‍സ്റ്റാളേഷന്‍ പൂര്‍ത്തിയാക്കി.

2019-09-03 00-03-35_1

ദ്രുപല്‍

തുടര്‍ന്നു് ദ്രുപല്‍ ഇന്‍സ്റ്റാള്‍ ചെയ്യാനുള്ള ശ്രമമായി. ആദ്യമായി താഴെ കൊടുത്ത കമാന്‍ഡുപയോഗിച്ചു് ദ്രുപലിന്റെ ലേറ്റസ്റ്റ് വേര്‍ഷന്‍ ഡൌണ്‍ലോഡ് ചെയ്തു.

$ sudo wget http://ftp.drupal.org/files/projects/drupal-8.0.5.tar.gz

ദ്രുപലിനു വേണ്ട മറ്റു് സോഫ്റ്റ്‌വെയര്‍ പ്രോഗ്രാമുകളെല്ലാം നേരത്തേ വേര്‍ഡ്പ്രസ്സിനു വേണ്ടി ഇന്‍സ്റ്റാള്‍ ചെയ്തിട്ടുണ്ടു്. അതു കൊണ്ടു് ട്യൂട്ടോറിയലിലെ താഴെ വരി കമാന്‍ഡ് ഒഴിവാക്കി:

$ sudo apt-get install php libapache2-mod-php php-cli php-mcrypt php-intl php-mysql php-curl php-gd php-soap php-xml php-zip

ഈ കമാന്‍ഡിലെ php-mcrypt പാക്കേജ് നേരത്തേ ഇന്‍സ്റ്റാള്‍‌ ചെയ്തിട്ടില്ല. ഈ പാക്കേജ് ഡെബിയന്‍ ബസ്റ്ററില്‍ ഉള്ളതായി കണ്ടതുമില്ല. ഇപ്പോള്‍ ആ പാക്കേജ് കാലഹരണപ്പെട്ടെന്നു തോന്നുന്നു.

താഴെ കമാന്‍ഡുപയോഗിച്ചു് php.ini ഫയല്‍ തുറന്നു് താഴെപ്പറയുന്ന പാരാമീറ്ററുകള്‍ അതാതിനു നേരെ ചേര്‍ത്ത പ്രകാരം മാറ്റി:

$ sudo nano /etc/php/7.0/cli/php.ini


memory_limit = 512M
date.timezone = UTC
cgi.fix_pathinfo=0
upload_max_filesize = 100M
post_max_size = 100M


ഇതിലെ date.timezone = Asia/Kolkata കൊടുക്കണമോയെന്നു ആദ്യം സന്ദേഹിച്ചെങ്കിലും, നല്ലതു് ട്യൂട്ടോറിയലില്‍ പറയുംപോലെ തന്നെയാണെന്നു കണ്ടു് അതുതന്നെ ചെയ്യാം എന്നു തീരുമാനിച്ചു.
അടുത്തതായി ഡിബിഎംഎസ് ഇന്‍സ്റ്റാള്‍ ചെയ്യലാണു്. വേര്‍ഡ്പ്രസ്സിനു വേണ്ടി നേരത്തേ തന്നെ മരിയഡിബി ഇന്‍സ്റ്റാള്‍ ചെയ്തിട്ടുള്ളതിനാല്‍ ട്യൂട്ടോറിയലിലെ ആ ഭാഗമുള്‍ക്കൊള്ളുന്ന കമാന്‍ഡുകള്‍ ഒഴിവാക്കി. ‍

$ sudo systemctl status mariadb

എന്ന കമാന്‍ഡ് കൊടുത്തപ്പോള്‍ അതു പ്രവര്‍ത്തിക്കുന്നുണ്ടെന്നു കണ്ടു. തുടര്‍ന്നു് ദ്രുപലിനു വേണ്ട ഡാറ്റാബേസ് സൃഷ്ടിക്കുവാനായി താഴെക്കൊടുത്ത കമാന്‍ഡുകള്‍ പ്രവര്‍ത്തിപ്പിച്ചു:

$ mysql -u root -p

MariaDB [(none)]> CREATE DATABASE drupaldb;

MariaDB [(none)]> GRANT ALL PRIVILEGES on drupaldb.* to ‘drupal’@’localhost’ identified by ‘my_password123’;

MariaDB [(none)]> FLUSH PRIVILEGES;

MariaDB [(none)]> \q

ഇനി നേരത്തേ ഡൌണ്‍ലോഡ് ചെയ്തു വച്ച ദ്രുപല്‍ സോഴ്സ് ടാര്‍ ബാള്‍ താഴെ ചേര്‍ത്ത കമാന്‍ഡുകളുപയോഗിച്ചു് അഴിച്ചെടുത്തു് /var/www/html/drupal/ ഫോള്‍ഡറില്‍ സ്ഥാപിച്ചു.

$ tar -zxvf drupal-8.7.6.tar.gz

$ mv drupal-8.7.6 drupal

$ sudo mv drupal /var/www/html/

എന്നിട്ടു് ആ ഫോള്‍ഡറിന്റെ ഓണര്‍ഷിപ്പും മോഡും താഴെ കമാന്‍ഡുകളുപയോഗിച്ചു് മാറ്റി.

$ sudo chown -R www-data:www-data /var/www/html/drupal

$ sudo chmod -R 777 /var/www/html/drupal

എന്നിട്ടു് /etc/apache2/sites-available/drupal.conf ഫയല്‍ nano ഉപയോഗിച്ചു് ഉണ്ടാക്കി തുറന്നു.

$ sudo nano /etc/apache2/sites-available/drupal.conf

എന്നിട്ടു് താഴെ കാണിച്ച വരികള്‍ അതില്‍ ചേര്‍ത്തു.


<VirtualHost *:80>
ServerAdmin admin@localhost.localdomain
DocumentRoot /var/www/html
ServerName localhost
<Directory “/var/www/html/drupal/”>
Options FollowSymLinks
AllowOverride All
Order allow,deny
allow from all
</Directory>
ErrorLog /var/log/apache2/drupal-error_log
CustomLog /var/log/apache2/drupal-access_log common
</VirtualHost>


താഴെ കൊടുത്ത കമാന്‍ഡുപയോഗിച്ചു് ദ്രുപല്‍ സൈറ്റ് എനാബിള്‍ ചെയ്തു.‍

$ sudo a2ensite drupal

എന്നിട്ടു് വിര്‍ച്ച്വല്‍ ഹോസ്റ്റും അപ്പാഷെയുടെ rewrite മൊഡ്യൂളും‍ enable ചെയ്തു:

$ sudo a2enmod rewrite

അപ്പാഷെ റീസ്റ്റാര്‍ട്ട് ചെയ്തു.

$ sudo systemctl restart apache2
വേണ്ടിയിരുന്നില്ലെങ്കിലും, UFW firewall ഇന്‍സ്റ്റാള്‍ ചെയ്തു് എനാബിള്‍ ചെയ്തു:

$ sudo apt-get install ufw

$ sudo ufw enable

$ sudo ufw allow 80

തുടര്‍ന്നു് ബ്രൌസറില്‍ ലോക്കല്‍ ഹോസ്റ്റിലെ ദ്രുപല്‍ അഡ്രസ്സ് കൊടുത്തപ്പോള്‍ ദ്രുപലിന്റെ ഇന്‍സ്റ്റാളര്‍ പ്രവര്‍ത്തിച്ചു.

http://localhost/drupal/

2019-09-03 00-03-30_1.png

അതില്‍ നേരത്തേ ദ്രുപലിനായി മരിയഡിബിയില്‍ സൃഷ്ടിച്ച ഡാറ്റാബേസും അതിലെ യൂസര്‍നെയിമും പാസ്‌വേര്‍ഡും കൊടുത്തു ദ്രുപല്‍ ഇന്‍സ്റ്റാളേഷന്‍ പൂര്‍ത്തിയാക്കി.

2019-09-03 21-02-52_3.png

2019-09-03 21-13-05_4.png

ദ്രുപല്‍ ഇന്‍സ്റ്റലേഷനു് ഇടയില്‍ ചില തെറ്റുകള്‍ സംഭവിച്ചിരുന്നു. അവ ശരിയാക്കാന്‍ സഹായിച്ച സ്വതന്ത്ര മലയാളം കമ്പ്യൂട്ടിങ്ങിലെ ബാലശങ്കറിനു നന്ദി.


അവലംബം:

[1] https://wordpress.org/

[2] https://wordpress.com/

[3] https://www.osradar.com/install-wordpress-debian-10/

[4] https://www.drupal.org/

[5] https://www.drupal.com/

[6] https://www.howtoforge.com/tutorial/how-to-install-and-configure-drupal-on-debian-9/

Advertisements

ഡെബിയന്‍ സ്ട്രെച്ചില്‍ നിന്നും ബസ്റ്ററിലേക്കു്

ഞാന്‍ എന്റെ ലാപ്പ്ടോപ്പില്‍ വര്‍ഷങ്ങളായി ഉപയോഗിക്കുന്ന ഓപ്പറേറ്റിങ് സിസ്റ്റം ഡെബിയന്‍ ഗ്നൂ/ലിനക്സ് എന്ന ഡിസ്ട്രിബ്യൂഷനാണെന്നു് മുമ്പൊരിക്കല്‍ എഴുതിയിരുന്നല്ലോ. ചെറുവണ്ണൂര്‍ ഗ്രാമപഞ്ചായത്തില്‍‍ ക്ലാര്‍ക്കായി ജോലി ചെയ്യുന്ന 2002-2006 കാലത്തു് 3.1 “സാര്‍ജ്” വേര്‍ഷന്‍ മുതലാണു് ഞാന്‍ ഡെബിയന്‍ ഡിസ്ട്രിബ്യൂഷന്‍ പരിചയപ്പെടുന്നതു്. അക്കാലത്താണു് ഹുസൈന്‍ മാഷുടെ “രചന” ആസ്കീ ഫോണ്ട് ഉപയോഗപ്പെടുത്തി അലക്സ് എ ജെ എന്ന ഡവലപ്പര്‍ ലാടെക്കിന്റെ മലയാളം എക്സ്റ്റെന്‍ഷന്‍ പുറത്തിറക്കിയിരുന്നതു് ശ്രദ്ധയില്‍പ്പെട്ടതു്. മലയാളം തനതു ലിപിയുടെ ആരാധകനായ ഞാന്‍ അതു് ആവേശത്തോടെ ഡെബിയന്‍ സാര്‍ജില്‍ ഇന്‍സ്റ്റാള്‍ ചെയ്തു് പഞ്ചായത്താഫീസിലേക്കുള്ള ചില ഫോറങ്ങള്‍ (forms‍) ലാടെക്കില്‍ ടൈപ്പ്സെറ്റ് ചെയ്തു് ഉപയോഗപ്പെടുത്തുകയുണ്ടായി. എന്റെ അന്നത്തെ പരിമിതമായ അറിവു വച്ചു് അന്നു തയ്യാറാക്കിയ ഫോറങ്ങളില്‍ രണ്ടെണ്ണം സാമ്പിളിനു് താഴെ കണ്ണികളില്‍ ചേര്‍ക്കുന്നു:

കെട്ടിടത്തിന്റെ ഉടമസ്ഥാവകാശവും നികുതിജമയും മാറ്റുന്നതിനുള്ള അപേക്ഷ

ബി പി എല്‍ സര്‍ട്ടിഫിക്കറ്റിനുള്ള അപേക്ഷ

ഈ തനതു ലിപിയിലെ ഫോമുകള്‍ കണ്ടു് അന്നു് പഞ്ചായത്താപ്പീസിലേക്കുള്ള ഫോമുകള്‍ അച്ചടിച്ചിരുന്ന ഡിടിപിക്കാര്‍ ചിലര്‍ (അവര്‍ക്കു് പിടിയിലൊതുങ്ങാതിരുന്ന) ഇതെങ്ങനെ സാധിച്ചെടുത്തുവെന്നു് കൌതുകത്തോടെ ചോദിച്ചതു് ഓര്‍ത്തു പോവുകയാണു്.

എങ്കിലും ഡെബിയനോടു് പ്രണയം തോന്നിത്തുടങ്ങിയതു് 4.0 “എച്ച്” വേര്‍ഷനോടെയാണു്. അന്നു് പഞ്ചായത്തില്‍ നിന്നും പഠനാവശ്യത്തിനുള്ള ശൂന്യവേതവനാവധിയില്‍ പ്രവേശിച്ചു് എം ജി യൂണിവേഴ്സിറ്റിയില്‍ 2006-2008 ബാച്ചില്‍ പരിസ്ഥിതി ശാസ്ത്രവും മാനേജ്‌മെന്റും എം എസ് സിക്കു് പഠിക്കുമ്പോള്‍ അവിടെ നടന്ന ഒരു മലയാള ഭാഷാ സെമിനാറിനു് കണ്ടു പരിചയപ്പെട്ടതാണു് വിമല്‍ ജോസഫിനെ. വിമലിന്റെ കയ്യില്‍ ഒരമൂല്യ വസ്തുവുണ്ടായിരുന്നു – യൂണിക്കോഡ് മലയാളം പിന്തുണയോടെ റീമാസ്റ്റര്‍ ചെയ്ത ഡെബിയന്‍ “എച്ച്”ന്റെ സിഡി – ഐ എസ് ഒ ഇമേജ്. അതു് ഞാന്‍ യു എസ് ബി പെന്‍ ഡ്രൈവില്‍ കോപ്പി ചെയ്തു വാങ്ങി. അന്നെനിക്കു് സ്വന്തമായി കമ്പ്യൂട്ടറോ ലാപ്പ്ടോപ്പോ ഒന്നുമില്ല. എന്നാലും ആവേശത്തോടെ സംഭവം കൊണ്ടു പോയി യൂണിവേഴ്സിറ്റി ഡിപ്പാര്‍ട്ട്മെന്റിലെ ബയോടെക്‍നോളജി ലാബിലെ കമ്പ്യൂട്ടറില്‍ സ്ഥാപിക്കാന്‍ അവിടെത്തെ റിസര്‍ച്ച് സ്കോളറായിരുന്ന രാകേഷിനോടു് അനുവാദം വാങ്ങി. അതില്‍ ആദ്യമേയുണ്ടായിരുന്ന വിന്‍ഡോസിനും അതിലെ പുള്ളിയുടെ ഇതര സോഫ്റ്റ്‌വെയര്‍ പ്രോഗ്രാമുകള്‍ക്കും തകരാറൊന്നും പറ്റരുതെന്നായിരുന്നു നിബന്ധന. എല്ലാം സമ്മതിച്ചു് ഐ എസ് ഒ ഇമേജ് സി ഡിയിലേക്കു് റൈറ്റ് ചെയ്തു് കമ്പ്യൂട്ടറിലിട്ട് ഇന്‍സ്റ്റാളര്‍ പ്രവര്‍ത്തിപ്പിച്ചു. മലയാളത്തില്‍ത്തന്നെ ലോക്കലൈസ് ചെയ്ത ഇന്‍സ്റ്റാളര്‍ കണ്ടു് ഞാന്‍ അത്ഭുതപ്പെട്ടു. ഇതൊക്കെ സാധിക്കുമല്ലേയെന്നു് ഒട്ടൊരു കൌതുകത്തോടെ മനസ്സിലാക്കി. അങ്ങനെ സംഗതി ആ കമ്പ്യൂട്ടറില്‍‍ വിന്‍ഡോസിനൊപ്പം ഡ്യുവല്‍ ബൂട്ടായി സ്ഥാപിച്ചു.‍ അന്നു് പാഠ്യപദ്ധതിയുടെ ഭാഗമായിരുന്ന ഫുള്‍ സെമസ്റ്റര്‍ പ്രൊജക്ട്, സ്വതന്ത്ര സോഫ്റ്റ്‌വെയര്‍ ജി ഐ എസില്‍ തന്നെ ചെയ്യണമെന്നു് വാശികേറി നില്ക്കുന്ന സമയമാണു്. അതുകൊണ്ടു് ഡെബിയനില്‍ പ്രവര്‍ത്തിക്കുന്ന ജി ഐ എസ് സോഫ്റ്റ്‌വെയര്‍ പ്രോഗ്രാമുകള്‍ തപ്പിപ്പിടിച്ചു് ചെന്നു്, ഗ്രാസ്സ് ജി ഐ എസിന്റേയും മറ്റും ഏറ്റവും പുതിയ വേര്‍ഷന്‍ സോഴ്സ് കോഡ് ഡൌണ്‍ലോഡ് ചെയ്തു് കമ്പൈല്‍ ചെയ്തു് അതില്‍ സ്ഥാപിച്ചു. അന്നു് തിരുവനന്തപുരത്തെ സ്പേസില്‍ ജോലി ചെയ്തിരുന്ന വിമല്‍ തന്നെയാണു്, അന്നു കെല്‍ട്രോണില്‍ ജോലി ചെയ്തിരുന്ന ഗ്രാസ് ജി ഐ എസ് പുലിയായ സജിത്തിനെ പരിചയപ്പെടുത്തിത്തരുന്നതു്…

അങ്ങനെ 2008ല്‍ ഗ്രാസ്സില്‍ അടിസ്ഥാന പരിജ്ഞാനവും കൊണ്ടു് പ്രൊജക്ട് ചെയ്യാന്‍ ഐ ഐ എസ് സിയിലേക്കു പോയി അവിടെ വച്ചു് വിമല്‍ എനിക്കു തന്ന റീമാസ്റ്റര്‍ ചെയ്ത ഡെബിയന്‍ “എച്ച്” ഉപയോഗിച്ചു തന്നെ പ്രൊജക്ട് പ്രവൃത്തികള്‍ പൂര്‍ത്തിയാക്കി. ഈ പ്രവര്‍ത്തനത്തിനിടയിലാണു് ഞാന്‍ മലയാളം കമ്പ്യൂട്ടിങ് മേഖലയിലെ പുലികള്‍ മിക്കവരെയും പരിചയപ്പെടുന്നതു്… അവരുടെയൊക്കെ സഹായത്തോടെയാണു് ആ പ്രൊജക്ട് പൂര്‍ത്തിയാക്കുന്നതും. അന്നു് പ്രൊജക്ട് ഗൈഡായിരുന്ന ഡോ. ടി വി രാമചന്ദ്ര സാറിനെ, പ്രൊജക്ടിനു വേണ്ടി എഴുതിയ പ്രോഗ്രാമിന്റെ സോഴ്സ് കോഡ് കാണിച്ചപ്പോള്‍ അതില്‍ സമൃദ്ധമായുണ്ടായിരുന്ന യൂണിക്കോഡ് മലയാളം ടെക്‍സ്റ്റ് കണ്ടു് എന്നോടു് “You keyed in YOUR language..!” എന്നു് അത്ഭുതത്തോടെ പറഞ്ഞതു് ഇന്നുമോര്‍ക്കുന്നു.

പ്രൊജക്ടും എം എസ് സിയും ഒക്കെ കഴിഞ്ഞെങ്കിലും, ഡെബിയനെ പിരിയാന്‍ തോന്നിയില്ല. 2009ല്‍ ആദ്യമായി ലാപ്‌ടോപ്പ് കമ്പ്യൂട്ടര്‍ വാങ്ങിയപ്പോള്‍ ഡെബിയന്‍ 5.0 “ലെന്നി” ആയിരുന്നു സ്ഥിരതയുള്ള വേര്‍ഷന്‍. പ്രീലോഡഡായി വന്നിരുന്ന വിന്‍ഡോസ് കളഞ്ഞു് ഡെബിയന്‍ “ലെന്നി” തന്നെ ലാപ്പ്ടോപ്പില്‍ സ്ഥാപിച്ചു. അതു കഴിഞ്ഞു് 2011ല്‍ 6.0 “സ്ക്യൂസ്” പിന്നെ 2013ല്‍ 7 “വീസി”, തുടര്‍ന്നു് 2015ല്‍ 8 “ജെസ്സി” പതിപ്പു വരെ ആ ലാപ്‌ടോപ്പില്‍ ഉപയോഗിച്ചു. പിന്നീടു് പുതിയ ലാപ്‌ടോപ്പ് വാങ്ങിയപ്പോള്‍ അതില്‍ ഉബുണ്ടുവായിരുന്നു പ്രീലോഡഡായി ഉണ്ടായിരുന്നതു്. അതിനെ കളഞ്ഞു് ഡെബിയന്‍ “ജെസ്സി” തന്നെ അതില്‍ സ്ഥാപിച്ചു. തുടര്‍ന്നു് 2017മുതല്‍‍ 9 “സ്ട്രെച്ച്” ആയിരുന്നു ലാപ്‌ടോപ്പില്‍. ഡെബിയനിലേക്കു് മാറിയ ശേഷം ഒരിക്കല്‍പ്പോലും മറ്റേതെങ്കിലും ഓപ്പറേറ്റിങ് സിസ്റ്റത്തിലേക്കു മാറണമെന്നു തോന്നിയിട്ടില്ല. വൈറസ് പ്രശ്നം ഇല്ലേയില്ല. എന്റെ വ്യക്തിഗത ആവശ്യങ്ങള്‍ക്കു് ഇതു് അത്രയും പെര്‍ഫെക്ടുമാണു്.

ഇക്കഴിഞ്ഞ 2019ജൂലൈ 6 നു് ഇതിന്റെ പുതിയ സ്ഥിരതയുള്ള‍ വേര്‍ഷന്‍ 10 “ബസ്റ്റര്‍”‍ റിലീസായി. മുമ്പെല്ലാം ഇതിന്റെ പുതിയ പുതിയ വേര്‍ഷനുകളിറങ്ങുമ്പോള്‍ ചെയ്യാറുള്ളതു പോലെ ഏതാനും ദിവസങ്ങള്‍ക്കുള്ളില്‍ത്തന്നെ എന്റെ ലാപ്പ്‌ടോപ്പും ഡിസ്റ്റ്-അപ്ഗ്രേഡ് ചെയ്തു ഈ പുതിയ വേര്‍ഷനിലേക്കു് മാറ്റണമെന്നുണ്ടായിരുന്നു (ഡിസ്റ്റ്-അപ്ഗ്രേഡെന്നാല്‍ ലാപ്പ്‌ടോപ്പിലെ / കമ്പ്യൂട്ടറിലെ ഓപ്പറേറ്റിങ് സിസ്റ്റം മാത്രമല്ല, അതിലുള്ള എല്ലാ സോഫ്റ്റ്‌വെയര്‍ പ്രോഗ്രാമുകളും ഒന്നിച്ചു് പുതിയ വേര്‍ഷനിലേക്കു് അപ്ഗ്രേഡ് ചെയ്യുന്ന പ്രക്രിയയാണു്. ഓരോ സോഫ്റ്റ്‌വെയര്‍ പ്രോഗ്രാമും വെവ്വേറെ ഇന്‍സ്റ്റാള്‍ ചെയ്തു് കുഴങ്ങേണ്ട ആവശ്യമില്ല). പക്ഷേ, ചുങ്കത്തറ ഗ്രാമപഞ്ചായത്തില്‍നിന്നുള്ള എന്റെ സ്ഥലം മാറ്റവും, കൊടിയത്തൂരിലെ ചാര്‍ജ്ജെടുക്കലും, തുടര്‍ന്നു വന്ന വെള്ളപ്പൊക്കവും മറ്റും കാരണം അതു നീണ്ടു പോയി. കഴിഞ്ഞ രണ്ടു ദിവസം അടുപ്പിച്ചു കിട്ടിയപ്പോള്‍ അതങ്ങു ചെയ്തു. ഇപ്പോഴിതു ടൈപ്പു ചെയ്യുന്നതു് പുതുതായി റിലീസായ ഡെബിയന്‍ ബസ്റ്റര്‍ ഉപയോഗിച്ചാണു്.‍

ഇതിനായി അനുവര്‍ത്തിച്ച നടപടികള്‍

ആദ്യമേ തന്നെ രണ്ടു ട്യൂട്ടോറിയലുകള്‍ എടുത്തു ഓഫ്‌ലൈനായി സേവ് ചെയ്തു വച്ചു.

https://linuxconfig.org/how-to-upgrade-debian-9-stretch-to-debian-10-buster

https://linuxize.com/post/how-to-upgrade-debian-9-stretch-to-debian-10-buster/

ഇവയിലെ നിര്‍ദ്ദേശങ്ങളനുസരിച്ചാണു് കാര്യങ്ങള്‍ നീക്കിയതു്. ആദ്യമേ താഴെപ്പറയുന്ന കമാന്‍ഡ് പ്രവര്‍ത്തിപ്പിച്ചു.

# aptitude search ‘~i(!~ODebian)’

സ്റ്റാന്‍ഡേര്‍ഡ് റെപ്പോസിറ്ററിയിലില്ലാത്ത പാക്കേജുകള്‍ ലിസ്റ്റ് ചെയ്തു. പ്രശ്നമുണ്ടാകാന്‍ സാദ്ധ്യതയുള്ളവ ഒന്നുമില്ലെന്നു് ഉറപ്പാക്കി. തുടര്‍ന്നു് ലാപ്പ്‌ടോപ്പില്‍ നിലവിലുള്ള വേര്‍ഷന്റെ റെപ്പോസിറ്ററിയിലുള്ള പാക്കേജുകള്‍ താഴെപ്പറയുന്ന കമാന്‍ഡുകള്‍ പ്രവര്‍ത്തിപ്പിച്ചു് അപ്ഗ്രേഡ് ചെയ്തു.

# apt-get update
# apt-get upgrade

തുടര്‍ന്നു് താഴെപ്പറയുന്ന കമാന്‍ഡ് പ്രവര്‍ത്തിപ്പിച്ചു് ഹോള്‍ഡ് ചെയ്തു വച്ച പാക്കേജുകള്‍ എന്തെങ്കിലുമുണ്ടോയെന്നു് നോക്കി.

# apt-mark showhold

അങ്ങിനെയുള്ളവയൊന്നും കണ്ടില്ല. പിന്നെ താഴെകൊടുത്ത കമാന്‍ഡ് ഉപയോഗിച്ചു് ഭാഗികമായോ മിസ്സിങ് ആയതോ, കാലഹരണപ്പെട്ടതോ ആയ പാക്കേജുകള്‍ ഉണ്ടോയെന്നു് നോക്കി.

# dpkg -C

അങ്ങനെയുള്ളവയൊന്നുമില്ലെന്നു കണ്ടതോടെ താഴെക്കൊടുത്ത കമാന്‍ഡ് പ്രവര്‍ത്തിപ്പിച്ചു:

# apt full-upgrade

അതു കഴിഞ്ഞു് ഇതും:

# apt-get dist-upgrade

Do you want to continue? [Y/n]

എന്ന ചോദ്യത്തിനു് Y എന്നു മറുപടി കൊടുത്തു. അതിന്റെ പണി തീര്‍ന്ന‍പ്പോള്‍ താഴെപ്പറയുന്ന കമാന്‍ഡു‍ കൂടി കൊടുത്തു:

# apt autoremove

മറ്റു പാക്കേജുകളുടെ കൂടെ വന്നതും തല്ക്കാലം ആവശ്യമില്ലാത്തവയുമായ പാക്കേജുകള്‍ ഇങ്ങനെ നീക്കം ചെയ്തു.
എന്നിട്ടു് താഴെപ്പറയുന്ന കമാന്‍ഡ് പ്രവര്‍ത്തിപ്പിച്ചു് sources.list ഫയലിന്റെ ബാക്കപ്പ് വേറെയെടുത്തു് സൂക്ഷിച്ചു.

#cd /etc/apt/
#cp sources.list sources.list.bak

എന്നിട്ടു് ഒറിജിനല്‍ /etc/apt/sources.list ഫയല്‍ nano ഉപയോഗിച്ചു തുറന്നു് ഡെബിയന്‍ സ്ട്രെച്ചിന്റെ സോഴ്സുകള്‍ നീക്കം ചെയ്തു് ഡെബിയന്‍ ബസ്റ്ററിന്റെ സോഴ്സുകള്‍ താഴെക്കൊടുത്ത പ്രകാരം ചേര്‍ത്തു:


deb http://ftp.uk.debian.org/debian/ buster main contrib non-free
deb-src http://ftp.uk.debian.org/debian/ buster main contrib non-free

deb http://ftp.uk.debian.org/debian/ buster-updates main contrib non-free
deb-src http://ftp.uk.debian.org/debian/ buster-updates main contrib non-free

deb http://security.debian.org/ buster/updates main contrib non-free
deb-src http://security.debian.org/ buster/updates main contrib non-free

# Backports repository
deb http://httpredir.debian.org/debian buster-backports main contrib non-free
deb http://ftp.debian.org/debian buster-backports main contrib non-free
deb http://http.debian.net/debian buster-backports main


എന്നിട്ടു് താഴെ കൊടുത്ത കമാന്‍‍ഡ് പ്രവര്‍ത്തിപ്പിച്ചു:

# apt update

ഡെബിയന്‍ ബസ്റ്ററിന്റെ സോഴ്സുകള്‍ അങ്ങനെ എന്റെ ലാപ്‌ടോപ്പിലെത്തി. പക്ഷേ അവസാനം ഒന്നു രണ്ടു എററുകള്‍ കണ്ടപ്പോള്‍, ഒന്നു കൂടി ഈ കമാന്‍ഡു തന്നെ പ്രവര്‍ത്തിപ്പിച്ചു നോക്കി. ഈ പ്രാവശ്യം എറര്‍ കണ്ടില്ല.
തുടര്‍‍ന്നു് താഴെ ചേര്‍ത്ത കമാന്‍ഡ് കൊടുത്തു:

# apt list –upgradable

അപ്ഗ്രേഡ് ചെയ്താല്‍ എന്റെ ലാപ്പ്‌ടോപ്പില്‍ നടക്കാന്‍ പോവുന്ന കാര്യങ്ങളുടെ ഒരു നീണ്ട ലിസ്റ്റ് കിട്ടി. എല്ലാം നോക്കി അവസാനം (press q to quit) എന്നു കണ്ടപ്പോള്‍ qഎന്നു കൊടുത്തു് പുറത്തു കടന്നു. തുടര്‍ന്നു് താഴെ ചേര്‍ത്ത കമാന്‍ഡ്‍ കൊടുത്തു:

# apt-get upgrade

അതിനു ശേഷം ഇതും:

# apt-get dist-upgrade‍

അങ്ങനെ ഡെബിയന്‍ പുതിയ വേര്‍ഷനിലേക്കു് അപ്ഗ്രേഡ് ചെയ്യാന്‍ തുടങ്ങി. ഞാന്‍ കാത്തിരിപ്പുായി. ഞാന്‍ ഒരു കാര്യം ശ്രദ്ധിച്ചിരുന്നില്ല: എല്ലാ പരിപാടിയും guiയില്‍ ആയിരുന്നു ചെയ്തു കൊണ്ടിരുന്നതു്. അതൊരു മോശം തീരുമാനമായിരുന്നു. കുറച്ചു കഴിഞ്ഞപ്പോ സിസ്റ്റം ഹാങ്ങായി. ഒരനക്കവും കാണാതായപ്പോള്‍ റീബൂട്ട് ചെയ്തു നോക്കി. പ്രോംപ്റ്റ് വരുന്നില്ല. പണി പാളി, കുടുങ്ങിയോയെന്നു മനസ്സില്‍ തോന്നി. എനിക്കറിയാവുന്ന ഡെബിയന്‍ ഡവലപ്പര്‍മാരിലൊരാളായ പ്രവീണ്‍ അരിമ്പ്രത്തൊടിയിലിനെ ഫോണില്‍ വിളിച്ചു കാര്യം പറഞ്ഞു. തുടര്‍ന്നു ചെയ്യേണ്ട കാര്യങ്ങള്‍ പ്രവീണ്‍ പറഞ്ഞതനുസരിച്ചു് ചെയ്തു. Reboot ചെയ്തു് GRUB ലോഡായപ്പോള്‍ ബൂട്ടിങ് ഓപ്ഷനുകളിലെ‍ Advanced options for Debian GNU/Linux എന്നതു സെലക്ട് ചെയ്തു. പ്രോംപ്റ്റ് കിട്ടി. എന്നിട്ടു് താഴെക്കൊടുത്ത പ്രകാരം കാമാന്‍ഡുകള്‍ പ്രവര്‍ത്തിപ്പിച്ചു:

# dpkg –configure -a
# apt dist-upgrade
# apt -f installed

അങ്ങനെ പരിഹാര ക്രിയകളൊക്കെ ചെയ്തു് വീണ്ടും താഴെക്കൊടുത്ത കമാന്‍ഡുകള്‍ തന്നെ പ്രവര്‍ത്തിപ്പിച്ചു:

# dist-upgrade
# apt-get update
# apt-get upgrade
# apt autoremove

ഇത്തവണ എററുകളൊന്നുമില്ലാതെ എല്ലാം നടന്നു. അങ്ങനെ എന്റെ ലാപ്പ്ടോപ്പിലെ ഡെബിയന്‍ അപ്ഗ്രേഡ് ചെയ്യല്‍ പൂര്‍ത്തിയായി. റീബൂട്ട് ചെയ്തപ്പോള്‍ പ്രശ്നങ്ങളൊന്നുമില്ലാതെ ബൂട്ട് ചെയ്തു.

ക്യുജിഐഎസ് സ്ഥാപിച്ച വിധം

എന്റെ ഒഴിവുസമയ വിനോദങ്ങളില്‍ പ്രധാനപ്പെട്ടൊരു ഐറ്റം റിമോട്ട് സെന്‍സിങ് / ജി ഐ എസ് പരീക്ഷണ പരിപാടികളാണു്. അതിനായി വേണ്ട ഗ്രാസ്സ് ജി ഐ എസ്, ക്യു ജി ഐ എസ് തുടങ്ങിയവയുടെ ലേറ്റസ്റ്റ് വേര്‍ഷനുകള്‍ സ്ഥാപിക്കാനുള്ള ശ്രമമായി. (ഡെബിയന്‍ ബസ്റ്ററിന്റെ ഒഫീഷ്യല്‍ റെപ്പോസിറ്ററിയില്‍ ഗ്രാസ്സും ക്യു ജി ഐ എസ്സുമെല്ലാമുണ്ടെങ്കിലും ക്യു ജി ഐ എസ് പഴയതാണെന്ന പ്രശ്നമുണ്ടു് -വേര്‍ഷന്‍ 2.18. ഇപ്പോഴത്തേതിന്റെ വേര്‍ഷന്‍ 3.8ആണു്). ഇതിനു വേണ്ടി etc/apt/sources.list ഫയലില്‍ ഡെബിയന്‍ സ്ട്രെച്ചിലെ ക്യു ജി ഐ എസ്സിന്റെ സോഴ്സുകള്‍ കമെന്റ് ചെയ്തു വച്ചിരുന്നതു് നീക്കം ചെയ്തു് ഡെബിയന്‍ ബസ്റ്ററിന്റെ സോഴ്സുകള്‍ താഴെക്കൊടുത്ത പ്രകാരം ചേര്‍ത്തു:


deb http://qgis.org/debian/ buster main
deb-src http://qgis.org/debian/ buster main


എന്നിട്ടു് താഴെപ്പറയുന്ന കമാന്‍ഡുകള്‍ പ്രവര്‍ത്തിപ്പിച്ചു:

# apt-get update
# apt-get install qgis qgis-plugin-grass

ഇന്‍സ്റ്റാളായതു പഴയ വേര്‍ഷന്‍ തന്നെ. കൂടാതെ കീ സെര്‍വര്‍ എററുകളും‍ കണ്ടു. എന്തു പറ്റിയാവോ. വീണ്ടും ക്യു ജി ഐ എസിന്റെ വെബ്ബ്സൈറ്റിലെ നിര്‍ദ്ദേശങ്ങള്‍ വായിച്ചു നോക്കി. എന്നിട്ടു് താഴെപ്പറയുന്ന കമാന്‍ഡുകള്‍ കൊടുത്തു:

# wget -O – https://qgis.org/downloads/qgis-2019.gpg.key | gpg –import
# gpg –fingerprint 51F523511C7028C3

അപ്പോള്‍ താഴെപ്പറയുന്ന ഔട്ട്പുട്ട് കിട്ടി:


pub rsa4096 2019-08-08 [SCEA] [expires: 2020-08-08]
8D5A 5B20 3548 E500 4487 DD19 51F5 2351 1C70 28C3
uid [ unknown] QGIS Archive Automatic Signing Key (2019) <qgis-developer@lists.osgeo.org>


തുടര്‍ന്നു് താഴെപ്പറയുന്ന കമാന്‍ഡുകള്‍ കൂടി കൊടുത്തു:

# gpg –export –armor 51F523511C7028C3 | sudo apt-key add –
# apt-key adv –keyserver keyserver.ubuntu.com –recv-key 51F523511C7028C3

ഇത്തവണ എററുകളൊന്നും കണ്ടില്ല.
വീണ്ടും താഴെക്കൊടുത്ത കമാന്‍ഡുകള്‍ പ്രവര്‍ത്തിപ്പിച്ചു:

# apt-get update
# apt-get install qgis qgis-plugin-grass

കമാന്‍ഡിന്റെ പ്രവര്‍ത്തനം കഴിഞ്ഞപ്പോള്‍ ക്യു ജി ഐ എസ് മെനുവില്‍ നിന്നു് എടുത്തു.‍ പുതിയ വേര്‍ഷന്‍ ക്യു ജി ഐ എസ് തന്നെ കിട്ടി. അങ്ങനെ അപ്ഗ്രേഡിങ് പരിപാടികള്‍ ശുഭപര്യവസായിയായി അവസാനിച്ചു.

ഹാപ്പി ഹാക്കിങ്…!

അവലംബം:

[1]https://www.debian.org/

[2]https://en.wikipedia.org/wiki/Debian

[3]https://linuxconfig.org/how-to-upgrade-debian-9-stretch-to-debian-10-buster

[4]https://linuxize.com/post/how-to-upgrade-debian-9-stretch-to-debian-10-buster/

[5]https://qgis.org/en/site/forusers/alldownloads.html#debian-ubuntu

വൈറസ് – സിനിമയും കൂരാച്ചുണ്ടിലെ നിപ്പക്കാലവും എന്റെ ഭൂപടവും.

ഇന്നു് ആഷിക്‍ അബു സംവിധാനം ചെയ്ത വൈറസ് എന്ന സിനിമ കണ്ടു. നല്ല സിനിമ. അഭിനേതാക്കള്‍ മിക്കവരും തന്നെ തങ്ങളുടെ മൂലകഥാപാത്രങ്ങളോടു് നീതി പുലര്‍ത്തിയിട്ടുണ്ടു്. എന്നാല്‍ സിനിമയില്‍ ഉള്‍പ്പെടാതെ പോയതും, വേണ്ടത്ര മിഴിവില്ലാതെ ഉള്‍പ്പെടുത്തിയതുമായ ചില കാര്യങ്ങള്‍ പറയുന്നതില്‍ അപാകമുണ്ടാവില്ലെന്നു കരുതുന്നു.

ഒന്നാമതു് ശ്രദ്ധയില്‍പ്പെട്ടതു് രേവതി അവതരിപ്പിച്ച ആരോഗ്യമന്ത്രി സി കെ പ്രമീളയുടെ കഥാപാത്ര രൂപകല്പനയാണു്. വളരെ ദുര്‍ബ്ബലയായ ഒരു സ്ത്രീയായാണു് അവരെ സിനിമയില്‍ അവതരിപ്പിച്ചിട്ടുള്ളതായിക്കണ്ടതു്. എന്നാല്‍ നിപ്പ ബാധിച്ച സമയത്തോ അതിനു മുമ്പോ പിന്‍പോ നമ്മുടെ ബഹുമാനപ്പെട്ട ആരോഗ്യമന്ത്രി കെ കെ ശൈലജടീച്ചര്‍ അത്തരമൊരു ദുര്‍ബ്ബലയായ ഒരാളാണെന്നു് ഒരു പ്രാവശ്യം പോലും തോന്നിച്ചിട്ടില്ല. വളരെ ഊര്‍ജ്ജസ്വലതയോടെയും കാര്യക്ഷമതയോടെയും തന്റെ ചുമതലകള്‍ നിര്‍വ്വഹിക്കുന്ന വ്യക്തിയായാണു് അവര്‍ തന്റെ പ്രവര്‍ത്തനമണ്ഡലത്തില്‍ ഇപ്പോഴും നിറഞ്ഞു നില്ക്കുന്നതു്. ഒരു പക്ഷേ സിനിമ എന്ന കലാസൃഷ്ടിയുടെ നാടകീയത സംരക്ഷിക്കുന്നതിനു വേണ്ടിയായിരിക്കാം ആ രീതിയില്‍ ചിത്രീകരിച്ചതു്.

പക്ഷേ നിപ്പ ബാധിച്ചു് ഒരാള്‍ മരണമേറ്റു വാങ്ങിയ കൂരാച്ചുണ്ടു് ഗ്രാമപഞ്ചായത്തില്‍ ആ സമയത്തു് ജോലി ചെയ്ത ഒരാളെന്ന നിലയില്‍ എനിക്കു വൈറസ് സിനിമയിലെ ആരോഗ്യമന്ത്രിയുടെ കഥാപാത്ര രൂപകല്പന അത്ര നന്നായിത്തോന്നിയില്ല. യഥാര്‍ത്ഥത്തില്‍ നടന്ന ഒരു കഥയാണല്ലോ സിനിമ പറയുന്നതു്. ആ കഥാപാത്രത്തെ ശൈലജ ടീച്ചറുടെ വ്യക്തിത്വത്തിനിണങ്ങും വിധത്തിലുള്ള ഒരാളായി സിനിമയില്‍ കാണിക്കാമായിരുന്നുവെന്നു തോന്നി.

രണ്ടാമതായി, ഞങ്ങള്‍ ലോക്കല്‍ അതോറിറ്റിക്കാരെ (അതായതു് മുനിസിപ്പല്‍ കോര്‍പ്പറേഷന്‍, മുനിസിപ്പാലിറ്റി, ഗ്രാമപഞ്ചായത്തു് സംവിധാനങ്ങള്‍) സിനിമയില്‍ കാര്യമായൊന്നും സ്പര്‍ശിക്കുന്നില്ല. ആശുപത്രികളിലും ഗവണ്മെന്റ് ഗസ്റ്റ്ഹൌസിലൊരുക്കിയ നിപ്പ സെല്ലിലും മാത്രമായാണു് സിനിമ മുന്നേറുന്നതു്. എന്നാല്‍ ജില്ലയിലെ മറ്റു ഉദ്യോഗസ്ഥസംവിധാനങ്ങളും ചെറുതെങ്കിലും, തങ്ങളുടേതായ പങ്കു് നിപ്പ പ്രതിരോധവിഷയത്തില്‍ നിര്‍വ്വഹിച്ചിട്ടുണ്ടു്. ഒരുപാടു കാര്യങ്ങളൊന്നും ഞങ്ങള്‍ക്കു ചെയ്യാനില്ലായിരുന്നുവെങ്കിലും, നിപ്പ ബാധിച്ച കാലത്തു് കൂരാച്ചുണ്ടു് ഗ്രാമപഞ്ചായത്തിലും പഞ്ചായത്തു് വകുപ്പിലും നടന്ന കാര്യങ്ങള്‍ പറയുന്നതു തെറ്റായിരിക്കില്ലെന്നു തോന്നുന്നു.

പകര്‍ച്ചവ്യാധി പ്രതിരോധ വിഷയത്തില്‍ മലബാര്‍ മേഖലയിലെ ലോക്കല്‍ അതോറിറ്റികള്‍ക്കുള്ള ചുമതല വിവരിച്ചിട്ടുള്ളതു് 1939ലെ മദ്രാസ് പൊതുജനാരോഗ്യ നിയമത്തിലാണു്. (തിരുവിതാംകൂര്‍-കൊച്ചി ഭാഗത്തു് 1955ലെ ട്രാവന്‍കൂര്‍-കൊച്ചിന്‍ പൊതുജനാരോഗ്യ നിയമത്തിനാണു് പ്രാബല്യം. കേരള സംസ്ഥാന രൂപീകരണ ശേഷം ഇത്ര വര്‍ഷങ്ങളായിട്ടും നമുക്കൊരു ഏകീകൃത പൊതുജനാരോഗ്യ നിയമമില്ലെന്നതു് വേറൊരു കുറിപ്പിനുള്ള വിഷയം.) പ്രസ്തുത നിയമത്തിലെ അദ്ധ്യായം 7ല്‍ പാര്‍ട്ട് ഒന്നിലെ സെക്‍ഷന്‍ 54ലും 55ലും മറ്റുമാണു് പകര്‍ച്ച വ്യാധികള്‍ നിയന്ത്രിക്കുന്നതില്‍ ലോക്കല്‍ അതോറിറ്റികള്‍ക്കുള്ള ചുമതലകള്‍ വിവരിക്കുന്നതു്.

04/06/2018നാണു് നിപ്പ സംബന്ധിച്ചു് പഞ്ചായത്തു് ഡെപ്യൂട്ടി ഡയറക്ടറുടെ ആദ്യത്തെ ഇ-മെയില്‍ കൂരാച്ചുണ്ടു് ഗ്രാമപഞ്ചായത്തിലേക്കു് വരുന്നതു്. നിപ്പ പനി നിരീക്ഷണത്തിലുള്ള ആളുകള്‍ക്കു് സൗജന്യമായി ഭക്ഷണ കിറ്റ് വിതരണം ചെയ്യുന്നതിനുള്ള ക്രമീകരണങ്ങള്‍ ഏര്‍പ്പെടുത്തുന്നതിനായി ബഹു. ജില്ലാ കളക്ടറുടെ അദ്ധ്യക്ഷതയില്‍ 04/06/2018നു് ചേര്‍ന്ന യോഗനിര്‍ദ്ദേശപ്രകാരമായിരുന്നു അതു്.

നിപ്പ പനി നിരീക്ഷണത്തിലുള്ളവരായി ആരോഗ്യ വകുപ്പു കണ്ടെത്തിയ അര്‍ഹതപ്പെട്ട ആളൂകള്‍ക്കു് സൗജന്യ ഭക്ഷണ കിറ്റ് വിതരണം ചെയ്യുന്നതിനു് സര്‍ക്കാര്‍ തീരുമാനിച്ചിട്ടുണ്ടെന്നും സിവില്‍ സപ്ലൈസ് വകുപ്പു് അതാതു പഞ്ചായത്തുകളിലെ മാവേലി സ്റ്റോറില്‍ / സപ്ലൈകോ ഔട്ട്‌ലെറ്റുകളില്‍ എത്തിക്കുന്ന ഭക്ഷണ കിറ്റ് അവിടെ നിന്നും കൈപ്പറ്റി സിവില്‍ സപ്ലൈസ് വകുപ്പു കൈമാറുന്ന ഗുണഭോക്താക്കള്‍ക്കു് എത്തിച്ചു കൊടുക്കേണ്ട ചുമതല അതാതു ഗ്രാമപഞ്ചായത്തുകള്‍ക്കാണെന്നും ഇതിനായി കുടുംബശ്രീ/ആശ/സന്നദ്ധപ്രവര്‍ത്തകരുടെ സേവനം അതാതു പഞ്ചായത്തുകളുടെ യുക്തി അനുസരിച്ചും പ്രയോജനപ്പെടുത്താവുന്നതാണെന്നും, അവ ഗുണഭോക്താക്കള്‍ക്കു ലഭിച്ചു എന്നു് ഉറപ്പു വരുത്തേണ്ട ചുമതല ബന്ധപ്പെട്ട ഗ്രാമപഞ്ചായത്തു് സെക്രട്ടറിക്കാണെന്നും ഭക്ഷണ കിറ്റുകള്‍ വീടുകളില്‍ എത്തിക്കുന്നതിനുള്ള വാഹന സൗകര്യങ്ങളും മറ്റു സഹായങ്ങളും ഗ്രാമപഞ്ചായത്തു് സെക്രട്ടറി ചെയ്തു കൊടുക്കേണ്ടതാണെന്നും. തൊട്ടടുത്ത ദിവസം 05/06/2018നു് വൈകുന്നേരത്തോടെ തന്നെ എല്ലാ ഗുണഭോക്താക്കള്‍ക്കും ഭക്ഷണ കിറ്റ് കിട്ടി എന്നു് ഉറപ്പുവരുത്തേണ്ടതാണെന്നും സിവില്‍ സപ്ലൈസ് വകുപ്പു് കൈമാറുന്ന ലിസ്റ്റിലുള്ളവരുടെ മേല്‍വിലാസത്തിലെ അവ്യക്തത, അപൂര്‍ണ്ണമായ മേല്‍വിലാസങ്ങള്‍ എന്നിവയും ഗ്രാമപഞ്ചായത്തു് മെമ്പര്‍മാര്‍ കുടുംബശ്രീ, ആശാവര്‍ക്കര്‍മാര്‍ എന്നിവരുടെ സഹായത്തോടെ കണ്ടെത്തേണ്ടതാണെന്നും ഇപ്രകാരം എല്ലാ ഗുണഭോക്താക്കള്‍ക്കും ഭക്ഷണ കിറ്റ് വിതരണം ചെയ്തു എന്ന റിപ്പോര്‍ട്ട് 06/06/2018നു് 11.00 മണിക്കു മുമ്പേ ജില്ലാ കളക്ടര്‍ക്കു്/ നിപ്പ സെല്ലിനു് അതാതു ഗ്രാമപഞ്ചായത്തു് സെക്രട്ടറിമാര്‍ സമര്‍പ്പിക്കേണതാണെന്നും, ഭക്ഷണ കിറ്റ് വിതരണം ചെയ്യുന്നതിനുള്ള യുക്തമായ ക്രമീകരണങ്ങള്‍ അതാതു ഗ്രാമപഞ്ചായത്തുകള്‍ ഏര്‍പ്പെടുത്തേണ്ടതും ഇതിന്റെ പ്രവര്‍ത്തനം ഫലപ്രദമായി നടക്കുന്നു എന്നു് ഗ്രാമപഞ്ചായത്തു് പ്രസിഡണ്ട് ഉറപ്പു വരുത്തേണ്ടതും വാര്‍ഡ് തലത്തില്‍ ഗ്രാമപഞ്ചായത്തു് മെമ്പര്‍മാരുടെയും സന്നദ്ധ പ്രവര്‍ത്തകരുടെയും സേവനം ഇക്കാര്യത്തില്‍ ലഭ്യമാക്കുന്നതിനു് പ്രസിഡണ്ട് മുന്‍കൈ എടുക്കേണ്ടതാണെന്നും മറ്റുമായിരുന്നു കത്തില്‍.

തുടര്‍ന്നു് 05/06/2018നു് പഞ്ചായത്തു് ഡെപ്യൂട്ടി ഡയറക്‍ടറുടെ അടുത്ത ഇമെയില്‍ വന്നു. അതു് ബഹുമാനപ്പെട്ട ജില്ലാ കളക്ടറുടെ 05/06/2018 തിയ്യതിയിലെ നിർദ്ദേശപ്രകാരമായിരുന്നു.

നിപ്പ വെെറസ് ബാധയുമായി ബന്ധപ്പെട്ട നിരീക്ഷണത്തില്‍ ഉൾപ്പെടുന്നവർക്കു് സൗജന്യ ഭക്ഷ്യധാന്യ കിറ്റ് നൽകേണ്ടവരുടെ ലിസ്റ്റ് ജില്ലാ ഭരണകൂടത്തിന്റെ കീഴിൽ പ്രവർത്തിക്കുന്ന നിപ്പ മീഡിയ സെല്ലിൽ നിന്നും ശേഖരിച്ചു് ജില്ലാ സപ്ലെെ ഒാഫീസർ ലഭ്യമാക്കിയിട്ടുണ്ടെന്നും പ്രസ്തുത ലിസ്റ്റ് ഉളളടക്കം ചെയ്യുന്നുവെന്നും, ബന്ധപ്പെട്ടവർക്കു് വിതരണം ചെയ്യേണ്ട കിറ്റുകൾ അന്നു് 2.00 മണിയ്ക്കു് മുമ്പായി ഞങ്ങളുടെ പഞ്ചായത്തു് പരിധിയിലെ സിവിൽ സപ്ലെെസ് ഒൗട്ട്‌ലെറ്റ് / മാവേലി സ്റ്റോറിൽ ജില്ലാ സപ്ലെെ ഒാഫീസർ എത്തിക്കുന്നതാണെന്നും കിറ്റുകൾ അടിയന്തിരമായി ഏറ്റുവാങ്ങി ഗ്രാമപഞ്ചായത്തു് പ്രസിഡന്റ് ആരോഗ്യവകുപ്പു് ജീവനക്കാർ എന്നിവരുമായി കൂടിയാലോചിച്ചു് ബന്ധപ്പെട്ടവർക്കു് എത്തിക്കേണ്ടതുമാണെന്നായിരുന്നു ഉള്ളടക്കം.

പ്രസ്തുത ലിസ്റ്റ് സ്വകാര്യമായി സൂക്ഷിക്കേണ്ടതാണെന്നും, ഇതു വ്യാപകമായി പ്രചരണം നടത്തിയാലുണ്ടാവുന്ന ഭവിഷ്യത്തുകൾക്കു് ഞങ്ങളുടെ ഒാഫീസിനു് ഉത്തരവാദിത്തമുണ്ടായിരിക്കുമെന്ന മുന്നറിയിപ്പു കൂടി കത്തിലുണ്ടായിരുന്നു.

മൂന്നു പ്രാവശ്യമായി കിട്ടിയ ലിസ്റ്റുകളില്‍ പഞ്ചായത്തില്‍ പല ഭാഗങ്ങളിലായുള്ള ആകെ 20 പേരുടെ കോണ്‍ടാക്റ്റ് വിവരങ്ങളുണ്ടായിരുന്നു. ലിസ്റ്റുകളും കത്തും നിര്‍ദ്ദേശവും കിട്ടിയ ഉടന്‍ അന്നു് പഞ്ചായത്തു് സെക്രട്ടറി തന്നെ, വിഷയത്തിന്റെ ഗൌരവമുള്‍ക്കൊണ്ടു് നേരിട്ടു് പ്രസ്തുത ഭക്ഷ്യധാന്യ കിറ്റുകള്‍ ഓരോ പ്രാവശ്യവും ഏറ്റു വാങ്ങുകയും പഞ്ചായത്തിന്റെ വാഹനത്തില്‍ ആരോഗ്യവകുപ്പു ജീവനക്കാരെക്കൂടി കൂടെ കൂട്ടി നേരിട്ടു് അതാതു വീടുകളില്‍ എത്തിക്കുകയാണുണ്ടായതു്. ഇങ്ങനെയുള്ള ചെറിയ ചെറിയ ഇടപെടലുകള്‍ ഈ വിഷയത്തില്‍ പല തലങ്ങളിലായി ജില്ലയില്‍ നടന്നിട്ടുണ്ടെന്നു കൂടി ഓര്‍മ്മിപ്പിക്കാനാണു് ഈ കുറിപ്പെഴുതിയതു്.

മൂന്നാമതായി,

സിനിമയിലൊരിടത്തു് ഉണ്ണികൃഷ്ണനു് രോഗം പകര്‍ന്നിരിക്കാനുണ്ടായ വഴികള്‍ അപഗ്രഥിക്കുന്ന സമയത്തു് കോഴിക്കോടു് ജില്ലയുടെ ഒരു ഭൂപടം കാണിക്കുന്നുണ്ടു്.

ആ ഭൂപടം വിക്കിപീഡിയ / വിക്കിമീഡിയ കോമണ്‍സില്‍ നിന്നെടുത്തു മോഡിഫൈ ചെയ്തതാണു്. അതിന്റെ അസ്സല്‍ ഭൂപടം വരച്ചതു് ഞാനാണു്. അതേന്നേയ്, 2011ല്‍ വരച്ചു് വിക്കിപീഡിയയിലും, വിക്കിമീഡിയ കോമണ്‍സിലും ഞാന്‍ തന്നെയാണു് കയറ്റിയിട്ടതു്. ഞാന്‍ വരച്ച ആ ചിത്രം എനിക്കു് ഒറ്റനോട്ടത്തില്‍ തിരിച്ചറിയാം. കാരണം അത്രയും സൂക്ഷ്മതലത്തിലുള്ള വിവരങ്ങള്‍ കൂട്ടിചേര്‍ത്താണാ ഭൂപടമുണ്ടാക്കിയതു്. സംശയമുള്ളവര്‍ക്കു് താഴെ കണ്ണികളില്‍ ചെന്നു് വെരിഫൈ ചെയ്യാം. അതില്‍ ചെന്നു് അതിന്റെ authorന്റെ ഡീറ്റെയില്‍സ് നോക്കിയാല്‍ മതി.

https://commons.wikimedia.org/wiki/File:Kozhikode-district-map-en.svg

https://ml.wikipedia.org/wiki/പ്രമാണം:Kozhikode-district-map-ml.svg

കോഴിക്കോടു് ജില്ലയിലെ ലോക്കല്‍ അതോറിറ്റികളുടെ അതിരുകളും, നിയമസഭാമണ്ഡലങ്ങളും അപ്റ്റുഡേറ്റായും കൃത്യമായും വരച്ചു ചേര്‍ത്തിട്ടുള്ള ഇന്നും ലഭ്യമായ ഒരേയൊരു ഭൂപടം അതേയുള്ളൂ. ആര്‍ക്കെങ്കിലും ഉപകാരപ്പെടട്ടെയെന്ന ഉദ്ദേശ്യത്തില്‍ത്തന്നെയാണു് അന്നു് മെനക്കെട്ടു് അതു വരച്ചതു്. എന്നാലും, അതു സിനിമ പോലെയുള്ള ഒരു കൊമേഴ്‌സ്യല്‍ ആവശ്യത്തിനു് എടുത്തുപയോഗിക്കുമ്പോ അതു വരച്ചയാളോടു് ചെറുതായെങ്കിലും ഒരാശയസംഭാഷണം നടത്തിയിരുന്നെങ്കില്‍ അതെന്നെപ്പോലുള്ളവര്‍ക്കു് ഒരു സന്തോഷമായേനെ. തുടര്‍ന്നും ഇത്തരം കാര്യങ്ങള്‍ ചെയ്യാന്‍ ഒരു പ്രചോദനമായേനെ. സിനിമയ്ക്കായി അതിലും മെച്ചപ്പെട്ട ഭൂപടമുണ്ടാക്കിത്തരാനും സാധിക്കുമായിരുന്നു. ആഹ് പോട്ട്…

അപ്പോ സലാം.

അപ്‌ഡേറ്റ് (05/07/2019 വൈകുന്നേരം)

ഇന്നലെ (04/07/2019) നു് സായംസന്ധ്യയ്ക്കു് ഫേസ്‌ബുക്കിലെ ‘വൈറസ്’ സിനിമയുടെ ഔദ്യോഗിക പേജിലും, സംവിധായകന്‍ ആഷിക്‍ അബുവിന്റെ പേജിലും, നിര്‍മ്മാതാവു് റിമ കല്ലിങ്കലിന്റെ പേജിലും, ഞാന്‍ വരച്ചു വിക്കിമീഡിയ കോമണ്‍സില്‍ ചേര്‍ത്ത കോഴിക്കോടു് ജില്ലയുടെ ഭൂപടം, കടപ്പാടു വയ്ക്കാതെ സിനിമയില്‍ ഉപയോഗിച്ചതിനുള്ള ക്ഷമാപണവും കടപ്പാടും അറിയിപ്പായി പ്രസിദ്ധീകരിച്ചിട്ടുണ്ടു്.

ഫേസ്ബുക്ക് പോസ്റ്റുകളിലേക്കുള്ള കണ്ണികള്‍ താഴെ ചേര്‍ക്കുന്നു.

https://m.facebook.com/story.php?story_fbid=388578951776900&id=337915413509921

https://m.facebook.com/story.php?story_fbid=1358519924317113&id=270685793100537

https://m.facebook.com/story.php?story_fbid=2211684115613479&id=311298132318763

അവര്‍ അതിനു് ക്രിയേറ്റീവ് കോമണ്‍സ് ലൈസന്‍സ് അനുശാസിക്കും വിധം യഥാവിധി കടപ്പാടു വയ്ക്കണമെന്നേ ഞാനാഗ്രഹിച്ചിരുന്നുള്ളൂ. പക്ഷേ, അവര്‍ അവരുടെ കടപ്പാടു് അറിയിച്ചതിനൊപ്പം, ക്രിയേറ്റീവ് കോമണ്‍സ് ലൈസന്‍സിലും മറ്റും പ്രസിദ്ധപ്പെടുത്തിയവ അടക്കമുള്ള ഇതര ഓപ്പണ്‍ ആക്സസ് പ്രസിദ്ധീകരണങ്ങള്‍ ഭാവിയില്‍ ശ്രദ്ധയോടെ കൈകാര്യം ചെയ്യാമെന്നുള്ള അവരുടെ പ്രതിജ്ഞാബദ്ധതയും, ആ ഭൂപടത്തെപ്പറ്റിയും, ഞാനടക്കമുള്ള വിക്കിമീഡിയ പ്രവര്‍ത്തകരെപ്പറ്റിയും വിശേഷാല്‍, എന്നെപ്പറ്റിത്തന്നെയും എന്റെ പ്രവര്‍ത്തനങ്ങളെപ്പറ്റിയും വിശദമായിത്തന്നെ അന്വേഷിച്ചറിഞ്ഞു് വിവരിച്ചതും, എന്റെ ഭാവി പ്രവര്‍ത്തനങ്ങള്‍ക്കുള്ള പിന്തുണയറിയിച്ചും പോസ്റ്റ് ചെയ്തതു കണ്ടും, നിരവധി ഓണ്‍ലൈന്‍ മാദ്ധ്യമങ്ങളില്‍ ഈ വിവരം പ്രസിദ്ധപ്പെടുത്തിക്കണ്ടും ഞാന്‍ വാസ്തവത്തില്‍ വണ്ടറടിച്ചു നില്ക്കുകയാണു്. ഇത്രയൊന്നും ഞാന്‍ സത്യമായും ആഗ്രഹിച്ചതേയല്ല, പ്രതീക്ഷിച്ചതുമല്ല. ആഷിക്‍ അബുവിനും, റിമ കല്ലിങ്കലിനും ‘വൈറസ്’ സിനിമാപ്രവര്‍ത്തകര്‍ക്കും ഹൃദയം നിറഞ്ഞ നന്ദി, സ്നേഹം.

വിശാലഹൃദയനായ ഗര്‍വ്വാസീസ് ആശാന്‍ (ജയ്സെന്‍ നെടുമ്പാല) ക്ഷമിച്ചിരിക്കുന്നു. 🙂

(യാത്രകളിലും, തിരക്കുകളിലും പെട്ടുപോയതിനാലാണു് ഈ കുറിപ്പു വൈകിയതു്.)

അപ്‌ഡേറ്റ് (07/07/2019 വൈകുന്നേരം)

പത്രമാദ്ധ്യമങ്ങള്‍ ഇതൊക്കെ കവര്‍ ചെയ്യുമെന്നുള്ളതു് എനിക്കൊരു പുതിയ അറിവാണു്. വെറുതേ സെര്‍ച്ചു ചെയ്തു നോക്കിയപ്പോള്‍ കിട്ടിയ കണ്ണികള്‍ താഴെ കൊടുക്കുന്നു. ഞാനിത്ര വല്യ സംഭവം ആയിത്തീര്‍ന്നെന്നു് അപ്പഴാണു മനസ്സിലായതു്… ഇനി കുറച്ചു വെയിറ്റൊക്കെയിട്ടു നില്ക്കാം, ല്ലേ? 🙂

ആഷിക്‍ അബുവിനെയും റിമ കല്ലിങ്കലിനെയും ഒന്നു നേരില്‍ കണ്ടു സംസാരിക്കണമെന്നുണ്ടെനിക്കു്.. വെറുതേയങ്ങനെ..

https://www.mathrubhumi.com/movies-music/news/aashiq-abu-facebook-post-about-a-mistake-in-virus-movie-1.3930862

https://www.manoramaonline.com/movies/movie-news/2019/07/06/aashiq-abu-facebook-post-about-a-mistake-in-virus-movie-tovino-asif.html

https://www.deshabhimani.com/cinema/movie-virus/808892

https://www.azhimukham.com/film-aashiq-abu-rima-kallingal-apologised-for-virus-map-courtesy/?fbclid=IwAR3_aWzBrcnwLArCl3wPgA3t_53Ytr4b058_PsnaSuPQzHXlIEvmHm4-cqI

https://www.southlive.in/movie/film-news/virus-movie-map-contraversy/

https://www.mediaonetv.in/entertainment/2019/07/04/aashiq-abu-rima-kallingal-apologised-for-virus-film-error

http://www.kairalinewsonline.com/2019/07/05/264723.html

https://malayalam.news18.com/news/film/movies-ashiq-rima-apology-map-used-in-virus-137079.html

https://www.doolnews.com/ashiq-abu-and-rima-kallingal-apologize-485.html

https://www.marunadanmalayali.com/scitech/cyber-space/director-aashiq-abus-fb-post-goes-viral-152050

https://malayalam.samayam.com/malayalam-cinema/movie-news/aashiq-abu-apologies-to-jaisen-nedumpala-on-virus-movie-kozhikode-district-map-controversy/articleshow/70085895.cms

സ്റ്റേറ്റ് ഓഫ് ദ മാപ്പ് – ഏഷ്യ 2018 കോണ്‍ഫറന്‍സില്‍ പങ്കെടുത്തതു്..

ഇനി, ഞാന്‍ ഈ കഴിഞ്ഞ 2018 നവംബര്‍ 17-18 തീയ്യതികളില്‍ ബാംഗ്ലൂര്‍ ഇന്ത്യന്‍ ഇന്‍സ്റ്റിറ്റ്യൂട്ടു് ഓഫ് മാനേജ്‌മെന്റില്‍ വച്ചു നടന്ന സ്റ്റേറ്റ് ഓഫ് ദ മാപ്പ് – ഏഷ്യ കോണ്‍ഫറന്‍സില്‍ പങ്കെടുത്ത കഥ പറയാം. സ്വതന്ത്ര മാപ്പിങ് പ്ലാറ്റ്ഫോമായ ഓപ്പണ്‍സ്ട്രീറ്റ്മാപ്പിന്റെ സംഘടനാ സംവിധാനമാണു് ഓപ്പണ്‍സ്ട്രീറ്റ്മാപ്പ് ഫൌണ്ടേഷന്‍. ഈ സംഘടന സ്റ്റേറ്റ് ഓഫ് ദ മാപ്പ് എന്ന പേരില്‍ എല്ലാ വര്‍ഷവും തെരഞ്ഞെടുത്ത ഏതെങ്കിലുമൊരു നഗരത്തില്‍ വച്ചു് ആഗോള തലത്തിലുള്ള കോണ്‍ഫറന്‍സ് നടത്താറുണ്ടു്. 2017ല്‍ ജപ്പാനില്‍ വച്ചു നടന്ന ഇത്തരമൊരു കോണ്‍ഫറന്‍സില്‍ ഞാന്‍ പങ്കെടുത്ത കഥ മുമ്പു് എഴുതിയിരുന്നല്ലോ. അതു പോലെത്തന്നെ സ്റ്റേറ്റ് ഓഫ് ദ മാപ്പിന്റെ റീജിയണല്‍ തലത്തിലുള്ള കോണ്‍ഫന്‍സുകളും നടത്താറുണ്ടു്. അങ്ങനെ ഏഷ്യന്‍ റീജിയണ്‍ തലത്തില്‍ ഇക്കഴിഞ്ഞ പ്രാവശ്യം നടത്താന്‍ നിശ്ചയിച്ചതു് ബാംഗ്ലൂര്‍ ഇന്ത്യന്‍ ഇന്‍സ്റ്റിറ്റ്യൂട്ട് ഓഫ് മാനേജ്‌മെന്റിലാണു് (ഐ ഐ എം). ഞാനും ഒരു പ്രസന്റേഷന്‍ തയ്യാറാക്കി അപേക്ഷിച്ചു, അതു അംഗീകരിച്ചു കിട്ടുകയും ചെയ്തു.

ഒന്നാം ദിവസം

അങ്ങനെ, കോണ്‍ഫറന്‍സിന്റെ തലേന്നു് ഞാന്‍ കോഴിക്കോടു് കെ എസ് ആര്‍ ടി സി ബസ്സ് സ്റ്റാന്റില്‍ നിന്നും ബസ്സ് കയറി ആദ്യദിവസം രാവിലെ ബാംഗ്ലൂര്‍ കെമ്പെഗൌഡ ബസ്സ് ടെര്‍മിനസില്‍ ഇറങ്ങി. മൊബൈല്‍ഫോണിലെ ഡാറ്റയും കാള്‍ പാക്കേജും തീര്‍ന്നിരുന്നു. അവിടെയടുത്തുള്ള ഒരു മൊബൈല്‍ കടയില്‍ കയറി റീചാര്‍ജ്ജു ചെയ്ത ശേഷം കോണ്‍ഫറന്‍സിനു വരാമെന്നേറ്റിരുന്ന മനോജിനെ (മനോജ് കരിങ്ങാമഠത്തില്‍) വിളിച്ചു നോക്കി. മനോജ് നേരത്തേ തന്നെ സ്ഥലത്തെത്തിയിട്ടുണ്ടു്. വഴിയെല്ലാം ചോദിച്ചു മനസ്സിലാക്കി ബസ്സു കയറി ഐ ഐ എമ്മിനടുത്തു ബുക്കു ചെയ്തിരുന്ന ഹോട്ടലില്‍ ചെന്നു കേറി ചെക്ക്-ഇന്‍ ചെയ്തു. രാവിലെത്തെ പല്ലുതേപ്പും കുളിയും മറ്റും കഴിഞ്ഞു് നേരെ ഐ ഐ എമ്മിലേക്കു് ചെന്നു. പ്രവേശന സ്ഥലത്തു തന്നെ പരിപാടിയുടെ വലിയ ഫ്ലക്സ് ബോര്‍ഡ് എന്നെ എതിരേറ്റു. രജിസ്ട്രേഷന്‍ ഡസ്കില്‍ ചെന്നപ്പോള്‍ അവിടെ ഇരിക്കുന്നവരിലൊരാള്‍ നമ്മുടെ “മുസിരിയന്‍” കെല്‍വിനാണു്. രജിസ്ട്രേഷന്‍ കഴിഞ്ഞു അകത്തെ മുറ്റത്തു ചെന്നപ്പോള്‍ അവിടെ എല്ലാവരും കാപ്പിയും കുടിച്ചു കൊണ്ടു് കൊച്ചുവര്‍ത്തമാനത്തില‍ാണു്. മാപ്പ് ബോക്‍സിലെ അരുണ്‍ ഗണേഷിനെ കണ്ടു. അവനുമായി സംസാരിച്ചു കൊണ്ടു നിന്ന പുകാര്‍ എന്ന സംഘടനയുടെ ഡയറക്‍ടര്‍ ഡോ. അനിത പാട്ടീലിനെ പരിചയപ്പെടുത്തിത്തന്നു. അധികം താമസിയാതെ അകത്തു കയറിയിരുന്നു. രാഹുല്‍ ദേയും മറ്റും പങ്കെടുത്ത ദീപം കൊളുത്തിക്കൊണ്ടുള്ള ചെറിയ ഉദ്ഘാടന സെഷന്‍ കഴിഞ്ഞു് നേരത്തേ പരിചയപ്പെട്ട ഡോ. അനിത പാട്ടീലിന്റെ കീനോട്ട് ടോക്ക് ആയിരുന്നു. മുംബൈയിലെ ഇന്‍ഫോര്‍മല്‍ സെറ്റില്‍മെന്റുകളില്‍ താമസിക്കുന്നവരെപ്പറ്റിയും, അവിടങ്ങളുടെ മാപ്പിങ്ങിനെപ്പറ്റിയും അവര്‍ സംസാരിച്ചു. തുടര്‍ന്നു നടന്ന പാനല്‍ ഡിസ്കഷന്‍ – State of the Map Country Panel- ജിനാല്‍ ഫോഫ്‍ലിയ മോഡറേറ്റ് ചെയ്തു. അതു തീര്‍ന്നപ്പോഴേയ്ക്കും ഉച്ചയായി. അപ്പോള്‍ എല്ലാവരുടെയും ഒരു ഗ്രൂപ്പ് ഫോട്ടോയെടുത്തു് ഉച്ചഭക്ഷണത്തിനു് പിരിഞ്ഞു.

46505973_10213257156849895_3011165824212795392_n

അതിമനോഹരമായ ക്യാമ്പസ്സാണു് ഐ ഐ എമ്മിന്റേതു്. എക്സ്പോസ്ഡ് ആര്‍ക്കിടെക്‍ചറില്‍ ചെയ്ത കെട്ടിടങ്ങളാണെല്ലാം. ഒരു അക്കാദമിക്‍ സ്ഥാപനത്തിന്റെ കെട്ടും മട്ടും എങ്ങനെ വേണമെന്നു് മുന്‍കൂട്ടിക്കണ്ടു് നിര്‍മ്മിച്ച പോലെയുണ്ടു് എല്ലാ കെട്ടിടങ്ങളും.

സ്വതന്ത്ര സോഫ്റ്റ്‌വെയര്‍, മാപ്പിങ് രംഗങ്ങളിലുള്ള സുഹൃത്തുക്കള്‍ മിക്കവരും പരിപാടിക്കു് എത്തിയിട്ടുണ്ടു്. സംഘാടക സമിതിയില്‍ത്തന്നെയുള്ള സജ്ജാദ് അന്‍വര്‍, പിന്നെ ആര്‍ക്ക് അര്‍ജ്ജുന്‍, അമ്പാടി, കണ്ണന്‍, ഹൈദരാബാദില്‍ നിന്നു വന്ന ലാവണ്യ ചല്ല, ബാംഗ്ലൂരിലെ ഓം ശിവപ്രകാശ്, തേജേഷ് ജി എന്‍, ഹൈദരാബാദില്‍ നിന്നു തന്നെയുള്ള ശ്രീഹര്‍ഷ തന്നീരു, മാപ്പ്ബോക്സിലുണ്ടായിരുന്ന ശ്രീവിദ്യ, ഹൈദരാബാദിലെ ഗൌതം ഗൊല്ലപ്പള്ളിയുടെ കമ്പനിയില്‍ ജോലി ചെയ്യുന്ന രണ്ടു സുഹൃത്തുക്കള്‍ തുടങ്ങിയവരൊക്കെ വന്നിട്ടുണ്ടു്.

ഉച്ചഭക്ഷണം കഴിഞ്ഞു് ഓഡിറ്റോറിയത്തില്‍ ലൈറ്റ്നിങ് ടോക്കുകളായിരുന്നു. ബംഗ്ലാദേശിലെ ധാക്ക യൂണിവേഴ്സിറ്റിയില്‍ നിന്നു വന്ന ഐറിന്‍ അക്തറിന്റെ, മാപ്പിങ്ങില്‍ പ്രാദേശിക ഭാഷ ഉപയോഗിക്കുന്നതിനെപ്പറ്റിയുള്ള അവതരണം, ഘന്‍ ശ്യാം വര്‍മ്മയുടെ, നേപ്പാള്‍ഗഞ്ചിലേക്കു് ഓപ്പണ്‍സ്ട്രീറ്റ്മാപ്പ് എന്ന പ്രസന്റേഷന്‍, എസ് എം സാവന്‍ ഷരിയാറിന്റെ ബംഗ്ലാദേശ് യൂത്ത്മാപ്പേഴ്സ് ചാപ്റ്ററിനെപ്പറ്റിയുള്ള പ്രസന്റേഷന്‍ എന്നിവ ശ്രദ്ധേയമായി. എന്റെ പ്രസന്റേഷന്‍ N001 എന്ന മുറിയിലായിരുന്നതിനാല്‍ ഉച്ചയ്ക്കു ശേഷം അവിടെ പോയി ഇരുന്നു. എന്റേതു് 2.40നായിരുന്നു. സംഗതി പഴേ ബോംബു കഥ തന്നെ – Mapping efforts in an unsurveyed land – Koorachundu Village Panchayat experience. അനുവദിച്ചതിനേക്കാള്‍ ഒരിത്തിരി സമയം ഞാന്‍ കൂടുതലെടുത്തു. പക്ഷേ എനിക്കീ കഥ പറഞ്ഞു പറഞ്ഞു മടുത്തു തുടങ്ങി. ഇനി പറയാന്‍ പുതിയ കഥ വല്ലതും ഉണ്ടാക്കണം 🙂 . തുടര്‍ന്നു് മനോജ് കരിങ്ങാമഠത്തില്‍ കേരളത്തിലെ വെള്ളപ്പൊക്ക സമയത്തു നടത്തിയ മാപ്പിങ്ങിനെപ്പറ്റയുള്ള പ്രസന്റേഷന്‍ അവതരിപ്പിച്ചു. 3:20നു് ഡെല്‍ഹിയില്‍ നിന്നും വന്ന മഹിമയുടെ Mapping River Use in Urban Areas: Relational Geography of Yamuna in Delhi among its User Communities എന്ന അവതരണത്തിനു് ശേഷം നവീന്‍ ഫ്രാന്‍സിസ് വിക്കിമീഡിയ മാപ്പുകളെപ്പറ്റി വിശദമായി സംസാരിച്ചു.‌ തുടര്‍ന്നു് വൈകുന്നേരത്തെ ചായയ്ക്കു് പിരിഞ്ഞു.

ഹേളവരു

ചായയ്ക്കു ശേഷം കര്‍ണ്ണാടക ഗ്രാമങ്ങളിലെ സവിശേഷ കഥ പറച്ചിലുകാരായ ഹേളവരു എന്ന പേരിലറിയപ്പെടുന്ന നാടോടി കലാകാരന്മാരെ പരിചയപ്പെടുത്തുന്ന പരിപാടിയായിരുന്നു. ഹേളവരു എന്നവര്‍ ഗ്രാമങ്ങളിലെ ഓരോ കുടുംബത്തിന്റെയും ചരിത്രവും പ്രത്യേകതകളും നീണ്ട കടലാസു ചുരുളുകളും പുസ്തകങ്ങളിലും എഴുതി സൂക്ഷിക്കുന്ന പതിവുണ്ടു്. ഇതു അവര്‍ തലമുറകളിലൂടെ കൈമാറി വരുന്നു. അവര്‍ നാടു നീളെ സഞ്ചരിച്ചു് തങ്ങള്‍ കൈകാര്യം ചെയ്യുന്ന കുടുംബകഥകള്‍ അവരുടെ ബന്ധുഗൃഹങ്ങള്‍ സന്ദര്‍ശിച്ചു് അല്പസ്വല്പം തമാശയുടെ അകമ്പടിയോടെയും കുടമണി കിലുക്കിക്കൊണ്ടും പാടുന്നു. ഇത്തരം ഒരു കഥയുടെ സാംപിള്‍ അവര്‍ ഞങ്ങള്‍ക്കു മുന്നില്‍ അവതരിപ്പിച്ചു. കന്നഡയിലായതിനാല്‍ ഏറെയൊന്നും മനസ്സിലാക്കാന്‍ പറ്റിയില്ലെങ്കിലും സദസ്സിലെ കന്നഡിഗര്‍ കേട്ടു ചിരിച്ചാസ്വദിക്കുന്നതു കണ്ടു. സംഭവം ഏതായാലും രസകരം തന്നെയാണെന്നു മനസ്സിലായി. ഇപ്രകാരം ഒരു സമുദായം മറ്റു കുടുംബങ്ങളുടെ മുന്‍-പിന്‍ തലമുറകളുടെ വിവരങ്ങള്‍ കാലങ്ങളായി എഴൂതി സൂക്ഷിച്ചു വരുന്നുണ്ടെന്നും ആ വിവരങ്ങള്‍ അവരിന്നും തങ്ങളുടെ സ്വന്തം അനന്തരാവകാശികളിലൂടെ തലമുറകള്‍ കൈമാറി സൂക്ഷിക്കുന്നുവെന്നുമുള്ളതു് എനിക്കു് ഒരു പുതിയ അറിവായിരുന്നു. ഗ്രാമീണ കര്‍ണ്ണാടകയുടെ സ്വഭാവം ഒന്നു കൂടി അടുത്തറിയാന്‍ പറ്റി.

46826684_10213272200665981_6775253202259410944_o

വൈകുന്നേരം അഞ്ചരയ്ക്കു ശേഷം ബേര്‍ഡ്സ് ഓഫ് ഫെതേഴ്സ് പരിപാടിയായിരുന്നു. N001നടുത്തുള്ള ചെറിയ റൂമില്‍ ഒത്തു കൂടിയ ഞങ്ങള്‍ക്കു്, ഐസിഫോസ്സില്‍ നിന്നു് വന്ന ദീപ്തിയും സഹപ്രവര്‍ത്തകരും അവര്‍ സാങ്കേതിക സഹായം ചെയ്തു് കെ എസ് ഇ ബി നടപ്പാക്കിയ, പവര്‍ലൈനുകളുടെ മാപ്പിങ്ങ് പരിചയപ്പെടുത്തിത്തന്നു.

അതിനു ശേഷം ആറര മണിക്കു് ബന്നേര്‍ഘട്ട മെയിന്‍ റോഡിലെ യെല്ലോ സബ്ബ്മറൈന്‍ എന്ന റസ്റ്റാറണ്ടില്‍ വച്ചുള്ള സോഷ്യല്‍ ഇവെന്റിലും ഉഷാറായി പങ്കെടുത്തു് അടുത്ത ദിവസത്തേക്കു് പിരി‍ഞ്ഞു.

photo6305474915444303975

രണ്ടാം ദിവസം

അടുത്ത ദിവസം – നവംബര്‍ 18ാം തീയ്യതി രാവിലെ ചെന്നപ്പോള്‍ “ഇമ്മിണി ബല്യ കമ്പ്യൂട്ടിങ്” വ്ലോഗര്‍ – മുജീബും, രഞ്ജിത്ത് സജീവും കൂട്ടരും കോണ്‍ഫറന്‍സിനെപ്പറ്റിയുള്ള പ്രതിനിധികളായെത്തിയവരുടെ അഭിപ്രായം വീഡിയോ റിക്കോഡിങ് ചെയ്യുന്നതു കണ്ടു. എന്നെയും അവര്‍ വിളിച്ചു വരുത്തി എന്റെ അഭിപ്രായം റിക്കോഡ് ചെയ്തു.

രാവിലെത്തെ ചായയ്ക്കു ശേഷം പത്തു മണിയോടെ പരിപാടികള്‍ ആരംഭിച്ചു. ഓഡിറ്റോറിയത്തില്‍ ആദ്യമായി നൂപുര്‍ റാവല്‍ മോഡറേറ്റ് ചെയ്ത Business of Geospatial Data in Asia – Industry expertsഎന്ന പാനല്‍ ഡിസ്കഷനായിരുന്നു. അതു കഴിഞ്ഞു് ശശാങ്ക് ശ്രീനിവാസന്റെ Using OSM data for biodiversity conservation എന്ന പ്രസന്റേഷന്‍ കൂടുതല്‍ ഉള്‍ക്കാഴ്ചകള്‍ സമ്മാനിച്ചു. തുടര്‍ന്നു് സിദ്ധാര്‍ത്ഥ് അഗര്‍വാള്‍ ഇന്ത്യയില്‍ പലേടത്തും നടന്നു് മാപ്പ് ചെയ്തതിന്റെ അനുഭവങ്ങള്‍ പങ്കുവച്ചു. പിന്നാലെ പ്രതാപ് വര്‍ദ്ധന്റെ Visualizing flood propagation with OSM and DEM എന്ന അവതരണം.

46815719_10213272249867211_1266762327206658048_o

പന്ത്രണ്ടു മണിക്കു് ഉച്ചഭക്ഷണത്തിനു് പിരിഞ്ഞു. കുശാലായ ഉച്ചഭക്ഷണത്തിനിടെ ഐ കെ എമ്മില്‍ നിന്നും വന്നവരുമായി സംസാരിച്ചു. ഉച്ചയ്ക്കു ശേഷം N001റൂമില്‍ ലൈറ്റ്നിങ് ടോക്‍സായിരുന്നു. സൈകത് മെയ്‌തി സുന്ദര്‍ബന്‍സ് മേഖലയിലെ ദ്വീപുകളുടെ വലിപ്പം ക്രമേണ കുറഞ്ഞു വരുന്നതിനെപ്പറ്റിയും അതിന്റെ മാപ്പിങ്ങിനെപ്പറ്റിയും സംസാരിച്ചു. തുടര്‍ന്നു് തേജേഷിന്റെ Community Created Free and Open Maps of India by Datameet, ശ്രീഹര്‍ഷ തന്നീരുവിന്റെ Mapping Rural Distress, ശ്രീവിദ്യയുടെ Mapping your Vacation Memories with Mapillary, റിഷബ് ജെയിന്‍ന്റെ Finding the Best Locations for LPG Centers, മിച്ചലീ ഇവാന്‍സിന്റെ Mapping Mosquitoes; Using community mapping and OSM to identify disease hotspots എന്നീ പ്രസന്റേഷനുകള്‍ കണ്ട ശേഷം സെന്‍ട്രല്‍ പെര്‍ഗോളയിലേക്കു് ചെന്നു. അവിടെ എര്‍വ്വിന്‍ ഒലേറിയോയുടെ വര്‍ക്ക്ഷോപ്പിന്റെ നടന്നു കൊണ്ടിരിക്കുകയായിരുന്നു – A crash course on web-based data mining and quick-and-dirty maps, with OpenStreetMap. അതും കണ്ടു് അവിടെയിരുന്നു.

അതിനു ശേഷം ഞങ്ങള്‍ കേരളത്തില്‍ നിന്നു് പരിപാടിക്കു വന്നവരെല്ലാം N001നടുത്തുള്ള ചെറിയ മുറിയില്‍ ഒത്തു കൂടി. അവിടെ വച്ചു കേരളത്തില്‍ മാപ്പിങ് പ്രവൃത്തികള്‍ ഊര്‍ജ്ജിതപ്പെടുത്താനുള്ള നടപടികളെന്തെല്ലാം വേണമെന്നു് ചര്‍ച്ച ചെയ്തു. ഇന്‍ഫോര്‍മേഷന്‍ കേരള മിഷനില്‍ നിന്നു് വന്നവരും മീറ്റിങ്ങിലുണ്ടായിരുന്നു. ഞങ്ങള്‍ പ്രൊജക്ടുകളുടെ സാദ്ധ്യതകളെപ്പറ്റി വിശദമായിത്തന്നെ ചര്‍ച്ച ചെയ്തു. ഒ എസ് എം കേരള കമ്മ്യൂണിറ്റി രൂപീകരിച്ചു തുടര്‍പ്രവൃത്തികള്‍ നടത്താന്‍ തീരുമാനിച്ചു.

നാലര മണിക്കു് ക്ലോസിങ് കീനോട്ട് – കബാഡിവാല കണക്ട് എന്ന സംഘടനയുടെ സി ഇ ഒ ആയ സിദ്ധാര്‍ത്ഥ് ഹാന്‍ഡെയുടെ മനോഹരമായ പ്രസന്റേഷന്‍ പുതിയ ഉള്‍ക്കാഴ്ചകള്‍ സമ്മാനിച്ചു. അതോടെ പരിപാടിക്കു് പര്യവസാനമായി. പരിപാടി കഴിഞ്ഞതോടെ ഞാന്‍ അവിടെയെല്ലാം പടങ്ങളെടുത്തു കൊണ്ടു് ചുറ്റിനടന്നു. മിക്കവരും യാത്ര പറഞ്ഞു പിരിഞ്ഞു. സന്ധ്യയോടെ ബാക്കിയുള്ള ഞങ്ങളെല്ലാവരും അവിടെ അടുത്തുള്ള ഒരു റസ്റ്റാറന്റില്‍ കയറി ഭക്ഷണം കഴിച്ചു് പിരിഞ്ഞു.

46863398_10213272252867286_6997864221954277376_o

പരിപാടിയെല്ലാം കഴിഞ്ഞു് നാട്ടിലേക്കു് തിരിക്കാനുള്ള സമയമായി. താമസിച്ച ഹോട്ടലിനു മുകളിലെ റസ്റ്റാറന്റില്‍ പിറ്റേന്നു് രാവിലെ, കോണ്‍ഫറന്‍സിനു പങ്കെടുക്കാന്‍ വന്ന മഹാരാഷ്ട്രക്കാരി അര്‍ച്ചനയെയും, സുന്ദര്‍ബന്‍സിലെ വലിപ്പം കുറയുന്ന ദ്വീപുകളുടെ കഥ പറഞ്ഞ സൈകത് മെയ്‌തിയെയും കണ്ടുമുട്ടി. അവരുമൊന്നിച്ചിരുന്നു് മാപ്പിങ്ങിനെപ്പറ്റി സംസാരിച്ചു കൊണ്ടു് പ്രഭാതഭക്ഷണം കഴിച്ചു പിരിഞ്ഞു.

അതിസാരോപാഖ്യാനം

ഉച്ചയോടെ എന്റെ വയറിനു് ചെറുതായി ഒരു അസ്കിത. ടോയ്‌ലെറ്റില്‍ ഇടയ്ക്കിടെ പോവണമെന്നു് തോന്നാന്‍ തുടങ്ങി. ഞാനിനി എങ്ങനെ ധൈര്യത്തില്‍ ബസ്സില്‍ കയറുമെന്നായി. വാടക കുറഞ്ഞ ഒരു ഹോട്ടലിലേക്കു് താമസം മാറ്റി – എപ്പഴാണീ മാരണം മാറുകയെന്നു പറയാന്‍ പറ്റില്ലല്ലോ. സമയം പോകെപ്പോകെ പ്രശ്നം കൂടെക്കൂടെ വഷളാവാന്‍ തുടങ്ങി. വയറാകെ നാശകോശമായി. വയറിനു പിടിക്കാത്തതെന്താണു തിന്നതെന്നു് ഒരോര്‍മ്മയും കിട്ടുന്നില്ല. ഹോട്ടല്‍ റിസപ്ഷനില്‍ ചെന്നു് അടുത്തു ഡോക്‍ടര്‍മാരാരെങ്കിലും പ്രാക്ടീസ് ചെയ്യുന്നവരുണ്ടോയെന്നു് അന്വേഷിച്ചു. കാര്യം പറഞ്ഞപ്പോ പോഹ, ഉറുമാമ്പഴം എന്നിവ വാങ്ങി കഴിച്ചാല്‍ ആശ്വാസം കിട്ടുമെന്നായി പുള്ളി. ഈ പോഹയെന്നാലെന്താണപ്പാ. ഹൂ, ആര്‍ക്കറിയാം. ഗൂഗിളില്‍ സെര്‍ച്ചു ചെയ്തു. പോഹയുടെ ചിത്രങ്ങള്‍ വന്നു. ആഹാ. സംഗതി നമ്മുടെ അവിലാണു്. അടുത്തു തന്നെ ഒരു ആശുപത്രിയുണ്ടെന്നും പുള്ളി പറഞ്ഞു. ഉടന്‍ വഴിയൊക്കെ ചോദിച്ചു മനസ്സിലാക്കി അവിടേക്കു് ചെന്നു. ഡോക്‍ടര്‍ വിശദമായിത്തന്നെ പരിശോധിച്ചു മരുന്നും ഒ ആര്‍ എസ്സും എഴുതിത്തന്നു.

പിറ്റേന്നു് രാവിലെയോടെ സംഗതി ഏതാണ്ടു് നിയന്ത്രണ വിധേയമായി. ബാംഗ്ലൂരിലുള്ള സുഹൃത്തുക്കളായ അനിവറിനെയും, നിഷാന്ത് മയിലാടനെയും ഫോണില്‍ വിളിച്ചു് കാര്യം പറഞ്ഞു. അനിവര്‍, അങ്ങോട്ടു ചെന്നാല്‍ കഞ്ഞി വച്ചു തരാമെന്നേറ്റു. പക്ഷേ, എനിക്കവിടേക്കു് ഈ കോലത്തില്‍ പോകാനൊരു മടി. അവിടെ ചെറിയ കുട്ടികളൊക്കെയുള്ളതല്ലേ. നിഷാന്ത് വീട്ടിലൊറ്റയ്ക്കേയുള്ളൂവെന്നും അങ്ങോട്ടു ചെല്ലാനും പറഞ്ഞതനുസരിച്ചു് അവിടെ ചെന്നു. നിഷാന്ത് ഭക്ഷണമൊക്കെയുണ്ടാക്കിത്തന്നു. പിറ്റേന്നു് വൈകുന്നേരത്തോടെ ഏതാണ്ടു് പൂര്‍ണ്ണമായി ആശ്വാസം കിട്ടി. എങ്കിലും ബസ്സില്‍ ടിക്കറ്റു ബുക്കു ചെയ്യാന്‍ ധൈര്യം വന്നില്ല. പകരം ട്രെയിനില്‍ ടിക്കറ്റ് ബുക്ക് ചെയ്തു. എപ്പഴാണു ആവശ്യം വരികയെന്നു പറയാന്‍ പറ്റില്ലല്ലോ. രാത്രിയോടെ നിഷാന്ത് റെയില്‍വേ സ്റ്റേഷനില്‍ കൊണ്ടാക്കിത്തന്നു. ട്രെയിന്‍ വന്നപ്പോള്‍ അതില്‍ കയറി അവനോടു യാത്ര പറഞ്ഞു് പിരിഞ്ഞു. നിഷാന്തിനു് നന്ദി. തിരികെ നാട്ടിലേക്കു്..

ഓപ്പണ്‍ കേജ് ജിയോകോഡര്‍ ബ്ലോഗിലും ഡക്കാണ്‍ ക്രോണിക്കിള്‍ പത്രത്തിലും ഞങ്ങളുടെ പ്രസന്റേഷനുകളെക്കുറിച്ചുള്ള വിവരങ്ങള്‍ പ്രാധാന്യത്തോടെ വന്നതു താഴെ.

https://blog.opencagedata.com/post/sotmasia18-not-on-the-map

photo6032786054546828762

പടങ്ങള്‍ക്കു കടപ്പാടു്: മനോജ് കരിങ്ങാമഠത്തില്‍, ആര്‍ക്ക് അര്‍ജ്ജുന്‍, മുജീബ്, കോണ്‍ഫറന്‍സില്‍ പങ്കെടുത്ത മറ്റുള്ളവര്‍.

കുടജാദ്രിയില്‍..

കുടജാദ്രിയില്‍ പോകണമെന്നതു് കുറേ നാളായുള്ള ആഗ്രഹമായിരുന്നു. അങ്ങനെ ഞങ്ങള്‍ സ്കൈവാക്ക് ട്രിപ് & ട്രെക്ക് എന്ന ഗ്രൂപ്പിന്റെ കൂടെ കഴിഞ്ഞ മഹാപ്രളയത്തിനു മുമ്പു് ആഗസ്തില്‍ അങ്ങോട്ടൊരു യാത്ര പോയി. ഞങ്ങള്‍ എന്നു പറഞ്ഞാല്‍, ഞാനും ശ്രീധന്യയും ശ്രേയയും. യാത്രച്ചെലവുകള്‍ക്കു് ഒരാള്‍ക്കു് 1950/- ആണു പറഞ്ഞിരുന്നതു്. അതിന്റെ അഡ്വാന്‍സ് കൊടുത്തു ടീമില്‍ കയറിപ്പറ്റി.

കോഴിക്കോടു് നിന്നും മംഗലാപുരം സെന്‍ട്രല്‍ വരെ 10/8/2018 നു് 23.55മണിക്കുള്ള വെസ്റ്റ് കോസ്റ്റ് എക്സ്പ്രസ്സിനും, മംഗലാപുരം സെന്‍ട്രല്‍ മുതല്‍ മൂകാംബിക റോഡ് (ബൈന്ദൂര്‍) വരെ 11/8/2018 നു് 6.05 മണിക്കുള്ള മഡ്ഗാവ് പാസഞ്ചറിനും, തിരിച്ചു് കൊല്ലൂരില്‍ നിന്നു് കോഴിക്കോട്ടേക്കു്, ഷിമോഗ മുതല്‍ തൃശൂര്‍ വരെ 12/8/2018 നു് 20.30 മണിക്കു് പോകുന്ന കര്‍ണ്ണാടക കെ എസ് ആര്‍ ടി സി ഐരാവതിനും ടിക്കറ്റുകളെടുത്തു റിസര്‍വ്വു ചെയ്തു. വെസ്റ്റ് കോസ്റ്റ് എക്സ്പ്രസ്സിനു് ടിക്കറ്റ് ചാര്‍ജ്ജ് രണ്ടു പേര്‍ക്കു് 390/ രൂപ, മഡ്ഗാവ് പാസഞ്ചറിനു് ടിക്കറ്റ് ചാര്‍ജ്ജ് രണ്ടു പേര്‍ക്കു് 110/- രൂപ, ഐരാവതിനു് രണ്ടു പേര്‍ക്കു് 1184/- രൂപ.

വെസ്റ്റ്കോസ്റ്റ് എക്സ്പ്രസ്സ് രാവിലെ മംഗലാപുരത്തെത്തുമ്പോള്‍ ഞങ്ങള്‍ക്കു തുടര്‍ന്നു പോവേണ്ട മഡ്ഗാവ് പാസഞ്ചര്‍ അവിടെ റെഡിയായിരിക്കും. അതില്‍ക്കയറി ബൈന്ദൂര്‍ ഇറങ്ങി അവിടെ നിന്നും കിട്ടുന്ന ബസ്സിലോ, ടാക്സിയിലോ കയറി കൊല്ലൂര്‍ മൂകാംബിക വരെയെത്തി അവിടെ വച്ചു് മറ്റു ഗ്രൂപ്പംഗങ്ങളുടെ കൂടെ ചേരുകയായിരുന്നു പ്ലാന്‍. യാത്രാദിവസവും കാത്തിരിക്കുമ്പോള്‍ ആഗസ്ത് 1-ാം തീയ്യതി കര്‍ണ്ണാടക കെ എസ് ആര്‍ ടി സിയുടെ അറിയിപ്പു വരുന്നു, കൊല്ലൂരില്‍ നിന്നു് തിരിച്ചു് കോഴിക്കോട്ടേക്കു് യാത്ര ബുക്കു ചെയ്ത കര്‍ണ്ണാടക കെ എസ് ആര്‍ ടി സി ബസ്സ് ട്രിപ്പ് കാന്‍സല്‍ ചെയ്തുവെന്നു്, കൂടെ കാശ് തിരിച്ചു് അക്കൌണ്ടിലേക്കു് മടക്കിയയക്കാമെന്നും. ഉടനേ വേറെ ബസ്സുണ്ടോയെന്നു് നോക്കി. അങ്ങനെ നമ്മുടെ സ്വന്തം ആനവണ്ടി കൊല്ലൂര്‍ – ആലപ്പുഴ കെ എസ് ആര്‍ ടി സി സൂപ്പര്‍ ഡീലക്സ് എയര്‍ ബസ്സില്‍ കോഴിക്കോട്ടേക്കു് 12/8/2018നു് 20.00 മണിക്കുള്ള ബസ്സില്‍ മടക്കയാത്ര ബുക്കു ചെയ്തു. 1068/- രൂപ.

അങ്ങനെ ടിക്കറ്റെല്ലാം ബുക്കു ചെയ്തു യാത്രാ ദിവസവും കാത്തിരുന്നു. യാത്രയ്ക്കു് ദിവസമടുത്തപ്പോള്‍ ശ്രേയക്കു് പനിയും ചുമയും പിടിപെട്ടു. പോകാന്‍ കഴിയുമോയെന്നു തന്നെ സംശയമായി. കുറയുമെന്നു പ്രതീക്ഷിച്ചെങ്കിലും യാത്രയുടെ മൂന്നു നാലു ദിവസം മുമ്പു വരെ ഇംപ്രൂവ്മെന്റൊന്നും കണ്ടില്ല. യാത്രയുടെ രണ്ടു ദിവസം മുമ്പു് ശ്രേയയുടെ നില മെച്ചപ്പെട്ടു. അങ്ങനെ പോകാമെന്നു തന്നെ തീരുമാനിച്ചു.

യാത്രാ ദിവസം രാത്രി കോഴിക്കോടു് റെയില്‍വേ സ്റ്റേഷനില്‍ വണ്ടിയും കാത്തിരിക്കുമ്പോള്‍ സംഘാംഗമായ ദീപയും ഞങ്ങളുടെ കൂടെ ചേര്‍ന്നു. ട്രെയിനെത്തിയപ്പോള്‍ അതില്‍ കയറി ബര്‍ത്തില്‍ക്കയറി കിടന്നുറങ്ങി ആഗസ്ത് 11നു് രാവിലെ മംഗലാപുരത്തെത്തി. മംഗലാപുരം സ്റ്റേഷനില്‍ നിന്നും അത്യാവശ്യ പ്രഭാതകൃത്യങ്ങളെല്ലാം കഴിച്ചു് മഡ്ഗാവ് പാസഞ്ചറില്‍ കയറിയിരുന്നു. ഞങ്ങള്‍ക്കും ദീപയ്ക്കും ഒരേ കമ്പാര്‍ട്ട്മെന്റില്‍ അടുത്തടുത്ത സീറ്റുകള്‍ തന്നെയായിരുന്നു കിട്ടിയതു്. ശ്രേയയും ദീപയും വേഗം തന്നെ കൂട്ടായി. ഞങ്ങള്‍ പുറമേയുള്ള കാഴ്ചകളും കണ്ടിരുന്നു.

ബൈന്ദൂരില്‍ എത്തിയപ്പോള്‍ അവിടെ റെയില്‍വേ സ്റ്റേഷനിലെ കാന്റീനില്‍ നിന്നു പ്രഭാതഭക്ഷണം കഴിച്ചു. അത്ര തൃപ്തിയൊന്നുമായില്ലെങ്കിലും, വേറെ ഓപ്ഷനില്ലാതിരുന്നതു കൊണ്ടു് അതു മതിയെന്നു വച്ചു. എന്നിട്ടു് ബൈന്ദൂര്‍ റെയില്‍വേസ്റ്റേഷന്‍ പരിസരത്തു നിന്നും ഒരു ടാക്സി പിടിച്ചു് കൊല്ലൂര്‍ക്കു് തിരിച്ചു. കര്‍ണ്ണാടകയുടെ ഗ്രാമക്കാഴ്ചകള്‍ക്കു് ഒരു പ്രത്യേക ഭംഗിയാണു്. കാഴ്ചകളും കണ്ടു് കൊല്ലൂരിലെത്തിയപ്പോള്‍ മിക്കവാറും ടീമംഗങ്ങള്‍ അവിടെയെത്തിയിരുന്നു. കുറച്ചു നേരം കഴിഞ്ഞപ്പോള്‍ മുഴുവന്‍ പേരും എത്തിച്ചേര്‍ന്നു.

എല്ലാവരും എത്തുന്നതിനിടെ റൂമില്‍‍ക്കയറി ഫ്രഷായി. കുറച്ചുനേരം വിശ്രമിച്ചു് ഉച്ചഭക്ഷണം കഴിച്ചു. ഓതന്റിക്‍ കര്‍ണ്ണാടക ഭക്ഷണമൊന്നുമല്ലെങ്കിലും വലിയ കുഴപ്പമില്ല. ഉച്ച തിരിഞ്ഞു് ടീം ലീഡ് ചെയ്യുന്ന റെനീഷിന്റെയും ഷിജി വിക്ടറിന്റെയും നേതൃത്വത്തില്‍ കുടജാദ്രിക്കു പോവുന്ന ഫോര്‍വീല്‍ ഡ്രൈവ് ജീപ്പുകള്‍ ബുക്കു ചെയ്തു. അങ്ങനെ കുടജാദ്രിക്കു് പുറപ്പെട്ടു. ഈ യാത്ര ഏറിയ പങ്കും ഓഫ് റോഡാണു്. ഒരു തരം അഡ്വഞ്ചര്‍ ട്രിപ്പ്. അസാദ്ധ്യ അനുഭവം. 3.20നു് കുടജാദ്രിയിലെത്തി. കോടമഞ്ഞും, ചാറ്റല്‍മഴയും. തണുത്തു വിറച്ചു. ശ്രേയയെ മഴക്കോട്ടിനുള്ളില്‍ പൊതിഞ്ഞു കെട്ടി.

കുടജാദ്രിയിലെ ക്ഷേത്രം ചെറുതാണു്.

അവിടെ ക്ഷേത്ര പരിസരത്തു് പുരാതനമായ ഒരു ഇരുമ്പു സ്തംഭമുണ്ടു്. കാഴ്ചയ്ക്കു് അത്രയ്ക്കു ഭംഗിയൊന്നുമില്ലെങ്കിലും ഇതിനു് വളര പഴക്കമുണ്ടു്. കാലാവസ്ഥ ഇത്രമേല്‍ പ്രതികൂലമായിട്ടും, കാലമിത്ര കഴിഞ്ഞിട്ടും അല്പം പോലും തുരുമ്പെടുക്കാത്ത ഇരുമ്പുതൂണ്‍. പ്രാചീന ഭാരതീയ ലോഹവിദ്യയുടെ നിദര്‍ശനം. ഈ തൂണിനെപ്പറ്റിയുള്ള കൂടുതല്‍ വിവരങ്ങള്‍ താഴെ കണ്ണിയില്‍ വായിക്കാം:-

http://www.iisc.ernet.in/~currsci/jun10/articles13.htm

ഞങ്ങള്‍ പടങ്ങളെടുത്തു കൊണ്ടു് സര്‍വ്വജ്ഞപീഠത്തിനരികിലേക്കു് നടന്നു കയറാനാരംഭിച്ചു. ശ്രേയ നടക്കാന്‍ കൂട്ടാക്കാതിരുന്നതു കൊണ്ടു് അവളെയും എടുത്തു കൊണ്ടാണു് കയറിയതു്. സംഘാംഗങ്ങള്‍ അവളെ മാറി മാറി എടുത്തു കൊണ്ടു് സഹായിച്ചു. അടുത്തൊന്നും മറ്റെവിടെയും ട്രെക്കിങ്ങിനു് പോയി പരിചയിക്കാതിരുന്നതിനാല്‍ സര്‍വ്വജ്ഞ പീഠത്തിനരികെ കയറിയെത്താന്‍ വളരെ ബുദ്ധിമുട്ടി. അവിടെയെത്തിയപ്പോള്‍ ആ മഞ്ഞും ചാറ്റല്‍മാഴയും ചേര്‍ന്ന അന്തരീക്ഷം അവാച്യമായൊരനുഭൂതി പകര്‍ന്നു. സര്‍വ്വജ്ഞപീഠത്തില്‍ ശങ്കരാചാര്യരുടെ ചെറിയൊരു ശില്പമുണ്ടു്. അവിടെ കുറച്ചു നേരം ചെലവിട്ടു. സംഘാംഗങ്ങളില്‍ ചിലര്‍ കുറേക്കൂടി അകലെയുള്ള സ്പോട്ടുകളിലേക്കു് ട്രെക്കിങ് പോയി. ഞങ്ങള്‍ അഞ്ചുമണിയോടെ തിരിച്ചിറങ്ങാനാരംഭിച്ചു. തിരികെ കുടജാദ്രി ക്ഷേത്രത്തിനു സമീപമെത്തി പടങ്ങളെടുത്തു. സന്ധ്യ കഴിഞ്ഞു് ഇരുട്ടു പരക്കാന്‍ തുടങ്ങി. എന്നിട്ടും ബാക്കിയുള്ള ടീമംഗങ്ങളെ കാണാനില്ല. ചീറിയടിക്കുന്ന മഴ, കൂടെ മഞ്ഞും. തണുത്തു വിറയ്ക്കുകയാണു്. കുടജാദ്രിയില്‍ ഉള്ള ഒരേയൊരു ചായക്കടയില്‍ നിന്നു് ഓരോ കട്ടന്‍ ചായ വാങ്ങിക്കുടിച്ചു. വിശപ്പിനു് കഴിക്കാനൊന്നും തന്നെ കിട്ടിയതുമില്ല. കുറേനേരം വാഹനത്തില്‍ കാത്തിരുന്നപ്പോള്‍ ടീമംഗങ്ങള്‍ ഓരോരുത്തരായി എത്താന്‍ തുടങ്ങി.

അങ്ങനെ ഞങ്ങള്‍ തിരികെ കൊല്ലൂരിലേക്കു് മടങ്ങി. രാത്രി ഭക്ഷണം കഴിച്ചു് റൂമില്‍ കയറി വിശ്രമിച്ചു.

പിറ്റേന്നു് അവിടെ പകല്‍ നില്ക്കുന്നവരുണ്ടെങ്കില്‍ ജോഗ് വെള്ളച്ചാട്ടം കാണാന്‍ പോകാമെന്നു് പറഞ്ഞു. ഞങ്ങളും ഒപ്പം കൂടി. അങ്ങനെ പിറ്റേന്നു് ഒരു ബസ്സ് ബുക്കു ചെയ്തു് ജോഗ് കാണാന്‍ യാത്രയായി. ബസ്സില്‍ പാട്ടു വച്ചപ്പോള്‍ ടീമംഗങ്ങള്‍ക്കൊപ്പം ശ്രേയയും ഡാന്‍സ് ചെയ്തു് അര്‍മ്മാദിച്ചു. ജോഗിലെത്തിയപ്പോള്‍ നല്ല മഴ, കോടമഞ്ഞും. വെള്ളച്ചാട്ടം മഞ്ഞു നീങ്ങുമ്പോള്‍ ഇടയ്ക്കെങ്ങാനും കണ്ടെങ്കിലായി. പക്ഷേ, മൂടല്‍മഞ്ഞിനിടയിലൂടെയുള്ള ആ കാഴ്ച മനോഹരമായിരുന്നു. പടങ്ങളെടുത്തു. കറച്ചു നേരം അവിടെ ചെലവിട്ട ശേഷം ഞങ്ങള്‍ തിരികെ മൂകാംബികയിലേക്കു തന്നെ മടങ്ങി.

സംഘാംഗങ്ങള്‍ മിക്കവരും യാത്ര പറഞ്ഞു പിരിഞ്ഞു. ഞങ്ങള്‍ക്കു പോവാനുള്ള ബസ്സ് രാത്രിയിലായതിനാല്‍ കുറച്ചു സമയം കൂടി മൂകാംബികയില്‍ ചെലവഴിക്കാം. അങ്ങനെ കുളിച്ചു ഫ്രഷായി ക്ഷേത്രദര്‍ശനത്തിനു ചെന്നു. ക്ഷേത്രത്തിന്റെ പ്രധാന കെട്ടിടം വിജയനഗരകാലഘട്ടത്തിലേതാണു്. മുഴുവനും ചുറ്റി നടന്നു കണ്ടു. ഈയിടെയായി പുതിയ ഗോപുരമുണ്ടാക്കിയതു് മതില്ക്കെട്ടുമായി ചേര്‍ന്നു നില്ക്കുന്നതായി കാണുന്നില്ല. പടങ്ങളൊക്കെയെടുക്കാന്‍ മറന്നില്ല. പ്രസാദമൊക്കെ വാങ്ങി തിരികെ ഹോട്ടലിലേക്കു മടങ്ങി.

രാത്രിയില്‍ നമ്മുടെ സ്വന്തം ആനവണ്ടിയില്‍ തിരികെ നാട്ടിലേക്കു്….

ഹ..! ജാങ്ക ചക്ക.. ജാങ്ക ചക്ക.. ജാങ്ക ചക്ക.. ജായ്.. :)

വീണ്ടുമൊരു ചക്കക്കാലം. കേരള സര്‍ക്കാര്‍ ചക്കയെ സംസ്ഥാനത്തിന്റെ ഔദ്യോഗിക ഫലമായി പ്രഖ്യാപിച്ചിരിക്കുകയാണല്ലോ. ഇന്നും ഞാന്‍ കഴിച്ചു കുറച്ചു പഴുത്ത ചക്കച്ചുളകള്‍. അപ്പോ തോന്നിയതാണു്, കുറച്ചു മുമ്പത്തെ (അതായതു് 2014 ജൂണിലെ) എന്റെ ഒരു ഫേസ്‌ബുക്ക് പോസ്റ്റ് ഇവിടെയും ഷെയര്‍ ചെയ്യാമെന്നു്. അന്നു് ശ്രേയക്കു് ഒരു വയസ്സു്. ഏതായാലും ഇതിവിടെയിടുന്നു:

ചക്ക മാഹാത്മ്യം – The jackfruit saga.

പണ്ടു് 1836ല്‍ മദ്രാസ് ഗവര്‍ണ്ണര്‍ക്കു് സര്‍ക്കാര്‍ സര്‍ജനായിരുന്ന വൈറ്റ്സ് എഴുതിയ കത്തിന്റെ തുടര്‍നടപടികളാണുപോല്‍ പഴയ മദ്രാസ് പ്രസിഡന്‍സി പ്രദേശത്തു് പിലാവും ചക്കയും വ്യാപകമാവാന്‍ കാരണമായതു്. അദ്ദേഹത്തിന്റെ കത്തിലെ പ്രസക്തഭാഗം: “മലബാറിലും സിലോണിലും കാണുന്ന ഒരു പഴവര്‍ഗ്ഗമാണു് ചക്ക. വളരെ സ്വാദുള്ളതും വലിപ്പമുള്ളതുമായ ഒരു പഴമാണിതു്… പാവപ്പെട്ടവന്റെ മുഖ്യഭക്ഷണം തന്നെയാണീ പഴം…

…നമ്മുടെ പ്രസിഡന്‍സിയില്‍ മുഴുവനായും ഇതു് കൃഷി ചെയ്യണമെന്നാണു് എന്റെ അഭിപ്രായം. ഈ പഴമുണ്ടാകുന്ന മരം പാതയോരത്തു് തണല്‍മരങ്ങളായി വച്ചു പിടിപ്പിക്കാം. തടി വീടുപണിക്കുപയോഗിക്കുന്ന വിലയേറിയ ഒരു മരമാണെന്നോര്‍ക്കുക. ജനങ്ങള്‍ക്കു് നല്ല ഭക്ഷണവും തണലും വിലയേറിയ മരവും കിട്ടുമെന്നതിനാല്‍ ഈ കൃഷിയെ നാം പ്രോത്സാഹിപ്പിക്കേണ്ടതാണു്. ഒരു പ്രദേശത്തിന്റെ സംസ്കാരത്തെയാണു് നാം ഉയര്‍ത്തിപ്പിടിക്കേണ്ടതു് എന്ന കാര്യം ഓര്‍ക്കുമല്ലോ.”

ഗവര്‍ണരാകട്ടെ ഈ കത്തു് ബോര്‍ഡ് ഓഫ് റവന്യൂവിന്റെ മുമ്പാകെ വച്ചു. അംഗീകാരം കിട്ടിയതോടെ, മദ്രാസ് പ്രസിഡന്‍സിയിലെ എല്ലാ ജില്ലാ കളക്‍ടര്‍മാര്‍ക്കും പിലാവുകൃഷി നടത്താന്‍ നിര്‍ദ്ദേശം നല്കി: “സര്‍ജന്‍ വൈറ്റ്സിന്റെ നിര്‍ദ്ദേശം നാം അംഗീകരിച്ചു കൊണ്ടു് പിലാവു കൃഷിയെ പ്രോത്സാഹിപ്പിക്കുവാന്‍ തീര്‍ച്ചപ്പെടുത്തിയിരിക്കുന്നു…

…താങ്കള്‍ എത്രയും പെട്ടെന്നു് നല്ല ചക്കക്കുരു ശേഖരിക്കുക. സിലോണിലെ കൊളോണിയല്‍ സെക്രട്ടറിയോടും നാം ഈ ആവശ്യം ഉന്നയിച്ചിട്ടുണ്ടു്. താങ്കളുടെ ജില്ലയിലെ പ്രധാന റോഡുകളുടെ ഇരു വശത്തും ഉടനടി തണല്‍ മരങ്ങളായി പിലാവുകള്‍ നട്ടു പിടിപ്പിക്കുക. ജില്ലയിലെ എല്ലാ സര്‍ക്കാര്‍ ഉദ്യോഗസ്ഥരും ചക്കക്കുരു ശേഖരിക്കേണ്ടതും അതു് പാതയോരങ്ങളില്‍ നട്ടു പിടിപ്പിക്കേണ്ടതുമാണു്. കൂടുതല്‍ വിത്തുകള്‍ മദ്രാസിലേക്കു് അയച്ചു തരികയും വേണം. ഇവിടെ നിന്നു് നല്ല വിത്തുകള്‍ അങ്ങോട്ടും അയച്ചു തരുന്നതായിരിക്കും. പിലാവു കൃഷി നമ്മുടെ സര്‍ക്കാരിന്റെ വിജയകരമായ ഒരു പദ്ധതിയാക്കി മാറ്റേണ്ടതു് താങ്കളുടെയും കീഴുദ്യോഗസ്ഥരുടെയും കടമയാണെന്നു് മറക്കരുതു്. പിലാവു് പാതയോരത്തു നട്ടാലും നാട്ടുകാരുടെ സ്വന്തം സ്ഥലത്തു് നട്ടാലും അതിന്റെ അവകാശം അവര്‍ക്കു തന്നെയാണെന്നു് ഓര്‍മ്മിപ്പിക്കുക…”.

31/12/1836 നു് സിലോണിലെ കൊളോണിയല്‍ സെക്രട്ടറി മദ്രാസ് ഗവര്‍ണര്‍ക്കു് ഇങ്ങനെ എഴുതി: “ചക്കക്കുരു ശേഖരിക്കാനുള്ള താങ്കളുടെ നിര്‍ദ്ദേശം സസന്തോഷം സ്വീകരിച്ചിരിക്കുന്നു. കുറെയേറെ ചക്കക്കുരു നാടിന്റെ നാനാ ഭാഗത്തു നിന്നും ശേഖരിച്ചിരിക്കുന്നു. ഉടനടി അയച്ചു തരുന്നതാണു്…”.

കളക്‍ടറുടെ നിര്‍ദ്ദേശം കിട്ടിയതിനെത്തുടര്‍ന്നു് മലബാര്‍ ജില്ലയിലെ തഹസീല്‍ദാര്‍മാരും, അംശം അധികാരിമാരും കോല്‍ക്കാരന്മാരുമൊക്കെ നാട്ടിടവഴികളിലൂടെ നടന്നു് ചക്കക്കുരു ശേഖരിച്ചതും, മലബാറിലെ പാതയോരങ്ങളിലെല്ലാം പിലാവുകള്‍ നട്ടതും, ഇന്നത്തെ ദക്ഷിണേന്ത്യയിലുള്‍പ്പെട്ട മദ്രാസ് പ്രസിഡന്‍സി പ്രദേശത്തു മുഴുവന്‍ പിലാവു് സര്‍വ്വ സാധാരണമായതുമൊക്കെ ചരിത്രം…

ജനാധിപത്യയുഗത്തില്‍ നമുക്കു് ഹരിതവിപ്ലവം നടന്നു, ഭക്ഷ്യസുരക്ഷ കിട്ടിത്തുടങ്ങി. ഇന്നിപ്പോ അക്കേഷ്യയോടും മട്ടിയോടും മറ്റുമാണു് നമുക്കു് കൂടുതല്‍ പ്രിയം. ചക്കയും പിലാവുമൊക്കെ ആര്‍ക്കു വേണം…

-ചരിത്രവസ്തുതകള്‍ക്കു് അവലംബം: കോഴിക്കോടിന്റെ പൈതൃകം – അഡ്വ. ടി ബി സെലുരാജ്, മാതൃഭൂമി ബുക്‍സ്.

ഒറിജിനല്‍ ഫേസ്‌ബുക്കു് പോസ്റ്റിലേക്കു് :- ഈ കണ്ണി

ഒരു ക്രൈം ത്രില്ലര്‍ സ്വപ്നം

അച്ഛന്റെ സര്‍ജ്ജറി കഴിഞ്ഞു് ഡിസ്ചാര്‍ജ്ജ് ചെയ്തു് ഇന്നലെ വൈകുന്നേരം വീട്ടില്‍ തിരിച്ചെത്തിയതേയുള്ളൂ. കുറേ ദിവസത്തെ ആസ്പത്രി വാസവും ഉറക്കമില്ലായ്മയും ഒക്കെക്കാരണം ഇന്നു് ഓഫീസില്‍ പോയില്ല. ഉച്ചയ്ക്കു് ഊണു കഴിഞ്ഞു് ഒന്നു മയങ്ങി. ഉറക്കത്തില്‍ ഞാനൊരു സ്വപ്നം കണ്ടു. ഇതെന്താണപ്പാ ഇത്രയ്ക്കെല്ലാം പറയാന്‍, ഉറങ്ങുന്നതും സ്വപ്നം കാണുന്നതും ഒക്കെ പതിവുകാര്യങ്ങളല്ലേ എന്നാവും. ഉം അതേ. ന്നാലും പറയാലോ. മുഴുവന്‍ വായിച്ചു കഴിയുമ്പോ ഇതിനകത്തു് കുറച്ചു സംഭവങ്ങളൊക്കെയുണ്ടെന്നു് നിങ്ങള്‍ക്കും തോന്നും. ഇനി അഥവാ തോന്നിയില്ലെങ്കിലും സാരമില്ല, മുഷിയില്ല. അപ്പോ തുടങ്ങാം..

പ്ലോട്ട്

രംഗം 1

ഞാനിങ്ങനേ കടപ്പുറത്തു കൂടെ അലസമായി അങ്ങനെ നടക്കുകയാണു്. ഏതോ ഒരു കടപ്പുറം. പ്രഭാതമാണോ സായാഹ്നമാണോ എന്നു് തീര്‍ച്ച പറയാന്‍ സാധിക്കാത്തവിധമുള്ള ഫീലാണു്. നേരിയ വെയിലുണ്ടു്. അടുത്തൊന്നും ആരെയും കാണാനില്ല. അപ്പോഴതാ കടലില്‍ ദൂരെ ഒരു സ്വകാര്യവിമാനം പ്രത്യക്ഷപ്പെടുന്നു. ഞാന്‍ അതിനെ സാകൂതം നോക്കി. ഇത്ര താഴെപ്പറക്കുന്ന ഒരു വിമാനത്തെ ഞാനാദ്യമായി കാണുകയാണു്. അതിങ്ങു കരയിലേക്കു് പ്രവേശിക്കാതെ കടലിനു മുകളില്‍ അധികം ഉയരത്തും ദൂരത്തുമല്ലാതെ ഒരു ഭീമന്‍ തുമ്പിയെപ്പോലെ സ്ഥിരമായി നിന്നു. അടുത്ത നിമിഷം അതില്‍ നിന്നു് ഒരു ബോട്ട് താഴെ കടലിലേക്കു് നിപതിച്ചു. കടലില്‍ കൃത്യമായി പതിച്ച ആ ബോട്ടിലേക്കു് വിമാനത്തില്‍ നിന്നും ഒരു ആള്‍രൂപം ചാടിയിറങ്ങുന്നതും കണ്ടു (ഇങ്ങനെ ചാടാന്‍ ആവുമോ, ചാടിയാല്‍ത്തന്നെ ആണ്ടു പോവാതിരിക്കുമോയെന്നൊക്കെയുള്ള ചോദ്യമെല്ലാം അവിടെ നില്ക്കട്ടെ, ബാക്കി കൂടി  വായിക്കൂ) കുറച്ചു നേരം കടലില്‍ ആ ബോട്ടും അതിലെ ആള്‍രൂപവും ചാഞ്ചാടിക്കളിച്ചു. അതു കഴിഞ്ഞു് ആ ബോട്ട് അതിവേഗത്തില്‍ കരയെ ലക്ഷ്യമാക്കി കുതിച്ചു. അതു് കരയിലേക്കു് അടുക്കും തോറും അതിലെ ആള്‍രൂപം വ്യക്തമായി വന്നു. അപ്സരസ്സാണോയെന്നു് സംശയം തോന്നിക്കുന്ന വിധം ഒരു സുന്ദരി (തന്നെ തന്നെ). വേഷം ഏതോ കറുത്ത ഒരു മെറ്റീരിയല്‍ കൊണ്ടു് നിര്‍മ്മിച്ച ജാക്കറ്റും പാന്റും (അതേ, ഹോളിവുഡ് ആക്‍ഷന്‍ സിനിമകളിലൊക്കെ കാണുന്ന പോലെ തന്നെ). അവളാ ബോട്ടും കൊണ്ടു് എന്റെ നേരെയാണല്ലോ വരുന്നതു്. ബോട്ട് കരയിലേക്കു് ഇടിച്ചു കയറി നിന്നു. അവള്‍ ബോട്ടില്‍ നിന്നു് ചാടിയിറങ്ങി. ഇവളെന്തിനുള്ള പുറപ്പാടാണപ്പായെന്നു് ഞാന്‍ മനസ്സില്‍ കരുതി. അവള്‍ നേരെ എന്റെ അടുത്തേക്കാണു വരുന്നതു്. നേരെ എന്റെ മുന്നില്‍ വന്നു നിന്ന അവള്‍ എനിക്കറിയാത്ത ഏതോ ഒരു ഭാഷയില്‍ എന്തോ പറഞ്ഞു. എനിക്കു മനസ്സിലായില്ല. ആ പറഞ്ഞ കൂട്ടത്തില്‍ landing permit എന്നൊരു വാക്കു കേട്ടതിനാല്‍ ഞാന്‍ കുറച്ചകലെയുള്ള കസ്റ്റംസ് ആപ്പീസിനു നേരെ കൈ ചൂണ്ടുി (അതേ. ഞാന്‍ സ്വപ്നം കാണുന്നതു മുന്‍ കൂട്ടിക്കണ്ടു് സര്‍ക്കാര്‍ അവിടെ കസ്റ്റംസ് ആപ്പീസും മറ്റും നേരത്തേ ഉണ്ടാക്കി വച്ചിട്ടുണ്ടേ). അവള്‍ അവളുടെ ഭാഷയില്‍ നന്ദി (ആണെന്നു് തോന്നുന്നു) പറഞ്ഞിട്ടു് അവിടേക്കു് വച്ചു പിടിച്ചു. എന്താണിതിന്റെയൊക്കെ പൊരുള്‍ എന്നറിയാനും (കൂട്ടത്തില്‍ അവളെ വായ നോക്കാനും) ഞാനും പിന്നാലെ ചെന്നു.

രംഗം 2

കസ്റ്റംസ് ആപ്പീസ് ഒരു ഹൈഫെ സെറ്റപ്പാണു്. അവള്‍ അവളുടെ ഭാഗം വിശദീകരിക്കുന്നു. അവിടെത്തെ ഉദ്യോഗസ്ഥര്‍ക്കു് അതു് മനസ്സിലാവുന്നുണ്ടെന്നു് തോന്നി (എനിക്കേ അവള്‍ പറഞ്ഞതു മനസ്സിലാവാത്തതുള്ളൂ). അപ്പോഴാണു് അടുത്തു നില്ക്കുന്ന ഒരുവന്‍ കടപ്പുറത്തു് ഒരു മൃതദേഹം അടിഞ്ഞതിന്റെ കാര്യവും ആ മരണത്തില്‍ അവള്‍ക്കു പങ്കുണ്ടോയെന്ന കാര്യം ചോദിച്ചറിയണമെന്നു പറഞ്ഞതു്. ഞാന്‍ ഞെട്ടി. ഇവള്‍ ഇത്തരക്കാരിയോ? ഉടനേ ഞാന്‍ അവിടം വിട്ടിറങ്ങി.

രംഗം 3

ആ മൃതദേഹം തിരഞ്ഞാണു് പിന്നെ എന്റെ പോക്കു്. കുറച്ചു ദൂരത്തായി കടപ്പുറത്തു തന്നെ ഒരു മരച്ചുവട്ടില്‍ ഞാനതു കണ്ടെത്തി. ആ മൃതദേഹത്തിനു മുകളില്‍ നിറയെ പൂമ്പാറ്റകള്‍, പക്ഷികള്‍

ഉണര്‍ന്നപ്പോള്‍

എന്നെ ആരോ വിളിച്ചുണര്‍ത്തി. നോക്കുമ്പോ കെട്ടിയവള്‍. സമയം നോക്കിയപ്പോ ഉച്ച തിരി‍ഞ്ഞു് മണി 3.30. ച്ഛെ. കുറച്ചു നേരം കൂടി കിട്ടിയിരുന്നെങ്കില്‍ ഇതിന്റെ ക്ലൈമാക്സ് കൂടി കാണായിരുന്നു. ഒരു ക്രൈം ത്രില്ലര്‍ മൂവിക്കു തിരക്കഥയെഴുതാനുള്ള സ്കോപ്പുണ്ടായിരുന്നു (അപ്പോ ഞാനാരായേനെ). ഇതിപ്പ ഇങ്ങനെ പാതി വഴിയില്‍ അവസാനിച്ചു പോയല്ലോ, സങ്കടം.

ഇതിലിപ്പോ യുക്തിക്കു നിരക്കാത്തതു പലതുമുണ്ടല്ലോയെന്നു് നിങ്ങള്‍ക്കൊരു പക്ഷേ തോന്നിയേക്കാം. ഉണര്‍ന്നെണീച്ചു് കുറച്ചു നേരം ആലോചിച്ചപ്പോ എനിക്കും ഇതിലെ പല കണ്ണികളും യോജിക്കാത്തതായി തോന്നി. എനിക്കിതിനു് ഒരു മറുപടിയേ പറയാനുള്ളൂ. ഇതു ഞാന്‍ സ്വപ്നം കണ്ടതാണു്, ഇതില്‍ ഇങ്ങനെയാണു്.

അപ്പോ സലാം.