വരള്‍ച്ചയും പഞ്ചായത്തുകളും ജി പി എസ്സും

ഇതെന്തു പറ്റി, പരസ്പരബന്ധമില്ലാതെയിങ്ങനെയോരോന്നു ടൈപ്പു ചെയ്തു വിടുന്നെ എന്നാവും ഇപ്പോ വിചാരം. അല്ലല്ലാ, എനിക്കു മാര്‍ച്ച് – ഏപ്രില്‍ മാസങ്ങളിലെ ചൂടില്‍ നട്ടപ്പിരാന്തു പിടിച്ചതൊന്നുമല്ല, സ്വബോധത്തില്‍ കരുതിക്കൂട്ടി ഇങ്ങനെത്തന്നെയാണു് ഞാനിതു ടൈപ്പു ചെയ്തതു്. ഈ മൂന്നും തമ്മിലുള്ള ബന്ധം ഇനി തുടര്‍ന്നു വായിക്കുമ്പോ വഴിയേ മനസ്സിലായിക്കോളും. അതുവരെ എനിക്കു നൊസ്സാണെന്നു തന്നെ കരുതിക്കോളൂ… 🙂

ഈ കുറിപ്പു് ഇത്തിരി വൈകിപ്പോയോ എന്നാണിപ്പോ എന്റെ സംശയം. അച്ഛന്റെ സര്‍ജ്ജറിയും ആസ്പത്രിവാസവും, പിന്നെ എന്റെ മടിയും ആണു് ഇതു വൈകിപ്പോവാനുള്ള കാരണങ്ങള്‍.

ഇനി കാര്യത്തിലേക്കു വരാം. ഇപ്പോ വേനല്‍ കനത്തു വരികയാണല്ലോ. പലേടത്തും ഇപ്പത്തന്നെ കിണറുകളില്‍ കുടിവെള്ളം വറ്റിത്തുടങ്ങി. അങ്ങിങ്ങായി കുറച്ചു് ഇടമഴ ലഭിച്ചെങ്കിലും പല പഞ്ചായത്തുകളിലെയും ജലക്ഷാമമുള്ളയിടങ്ങളില്‍ നിന്നും, ഇനി വരാന്‍ പോവുന്ന ആഴ്ചകളില്‍ ടാങ്കറുകളില്‍ കുടിവെള്ളം വിതരണം ചെയ്യാന്‍ മുറവിളി ഉയരാനുള്ള സാദ്ധ്യത കാണുന്നു.

സര്‍ക്കാര്‍ ഉത്തരവു്

‘കാലാവസ്ഥാ വ്യതിയാനം കൊണ്ടാണു് മഴ കുറയുന്നതും കുടിവെള്ളമില്ലാതാകുന്നതും, മരങ്ങള്‍ നട്ടു പിടിപ്പിച്ചാലേ രക്ഷയുള്ളൂ’ എന്നിങ്ങനെയൊക്കെ നമുക്കു് വിലയിരുത്തിപ്പറയുകയും, ദീര്‍ഗ്ഘകാലാടിസ്ഥാനത്തിലുള്ള പോംവഴികള്‍ നിര്‍ദ്ദേശിക്കുകയും ആ രീതിയില്‍ പരിശ്രമിക്കുകയുമൊക്കെ ചെയ്യാം. പക്ഷേ, അതു കൊണ്ടു് ഇന്നോ നാളെയോ മറ്റന്നാളോ അത്യാവശ്യത്തിനുപയോഗിക്കാനുള്ള കുടിവെള്ളം ഉടനടി കിട്ടുകയില്ലല്ലോ. അതിനു് തല്ക്കാലം കുടിവെള്ളം ടാങ്കറുകളില്‍ വിതരണം ചെയ്തേ മതിയാവൂ. അതിനാല്‍ സര്‍ക്കാര്‍ നേരത്തേ തന്നെ, പഞ്ചായത്തുകള്‍ കുടിവെള്ളം വിതരണം ചെയ്യേണ്ടതെങ്ങനെയെന്നു് 21/03/2018 തീയ്യതിയില്‍ സ.ഉ.(സാധാ) നം. 754/2018/തസ്വഭവ നമ്പ്രായി സ്പഷ്ടവും വിശദവുമായ ഉത്തരവിറക്കിയിട്ടുണ്ടു്.

ഈ ഉത്തരവു് ഈ കണ്ണിയില്‍ ലഭ്യമാണു്:

https://go.lsgkerala.gov.in/files/go20180321_20352.pdf

ഇതിന്നായി ചെലവഴിക്കാവുന്ന പരമാവധി തുകയും മറ്റും ഉത്തരവിലുണ്ടു്.

എന്നാല്‍ ഈ ഉത്തരവിന്റെ (3), (4) ഖണ്ഡികകള്‍‍ ഒന്നു് ശ്രദ്ധിച്ചു വായിച്ചു നോക്കൂ. ജി പി എസ് ഘടിപ്പിച്ച ടാങ്കറുകളില്‍ കുടിവെള്ള വിതരണം നടത്തുകയും, ഇതിന്റെ മോണിറ്ററിങ് നടത്തുന്നതിനുള്ള സംവിധാനവും ജി പി എസ് ട്രാക്കിങ്ങിനുള്ള സംവിധാനവും തദ്ദേശസ്വയംഭരണസ്ഥാപനങ്ങളുടെ ജില്ലാതല മേധാവികള്‍ ഏര്‍പ്പെടുത്തേണ്ടതാണു് എന്നും, ജി പി എസ് ലോഗും വാഹനത്തിന്റെ ലോഗ് ബുക്കും ക്രോസ് ചെക്ക് ചെയ്തു് സുതാര്യത ഉറപ്പു വരുത്തിയ ശേഷം തദ്ദേശസ്വയംഭരണസ്ഥാപനത്തിന്റെ സെക്രട്ടറിമാര്‍ ചെലവു് തുക വിനിയോഗിക്കേണ്ടതാണു് എന്നും കൂടി ഉത്തരവില്‍ കാണുന്നു.

കഴിഞ്ഞ വര്‍ഷത്തെ പ്രവര്‍ത്തനം

ജി പി എസ്സും ജി ഐ എസ്സും ഒക്കെ സര്‍ക്കാര്‍ രേഖകളില്‍ കണ്ടാല്‍ അതു ചികഞ്ഞു നോക്കല്‍ ഇപ്പോ ഒരു ശീലമായിട്ടുണ്ടു്. ഈ ഉത്തരവു് ഗ്രാമപഞ്ചായത്തു് ജീവനക്കാരുടേതായ വാട്ട്സ്ആപ്പ് ഗ്രൂപ്പുകളിലൊന്നില്‍ ചര്‍ച്ചയ്ക്കു് വന്നു് അനില്‍ സാര്‍ എന്റെ ശ്രദ്ധയില്‍പ്പെടുത്തിയപ്പോള്‍ ആദ്യം തോന്നിയതു് ആന്‍ഡ്രോയ്ഡ് മൊബൈല്‍ ഫോണ്‍ ആപ്പും മറ്റുമുപയോഗിച്ചുള്ള ഒരു quick and dirty സൊലൂഷനാണു്. എന്നാല്‍ ഈ വിഷയത്തില്‍ അങ്ങിനെയൊരു സമീപനത്തിന്റെ അപകടം വിനോദ് സാര്‍ ചൂണ്ടിക്കാട്ടിയപ്പോള്‍ ഇതിനെപ്പറ്റി കുറച്ചുകൂടി ആഴത്തില്‍ മനസ്സിലാക്കേണ്ടതുണ്ടെന്നു് തീരുമാനിച്ചു. അങ്ങനെ ഇതിനെപ്പറ്റി പലരോടുമന്വേഷിച്ചു. കഴിഞ്ഞ വര്‍ഷം റവന്യൂ വകുപ്പു് വില്ലേജാപ്പീസുകള്‍ വഴി കുടിവെള്ളം വിതരണം ചെയ്തപ്പോള്‍ ഇത്തരമൊരു സൊലൂഷന്‍ ഉപയോഗിച്ചിട്ടുണ്ടായിരുന്നുവെന്നു് വിവരം കിട്ടിയപ്പോള്‍ ആ വഴിയും അന്വേഷിച്ചു. സര്‍ക്കാര്‍ സ്ഥാപനമായ കെല്‍ട്രോണിലും അന്വേഷിച്ചു. ഇന്റര്‍നെറ്റിലും ഒരു തിരച്ചില്‍ നടത്തി. അങ്ങനെ ഞാന്‍ മനസ്സിലാക്കിയ വിവരങ്ങളാണു് ഇനി പറയാന്‍ പോവുന്നതു്.

കഴിഞ്ഞ വര്‍ഷം ഈ വിധം കോഴിക്കോടു് ജില്ലയിലെ വരള്‍ച്ചബാധിത പ്രദേശങ്ങളില്‍ റവന്യു വകുപ്പു മുഖേന ജി പി എസ് ഘടിപ്പിച്ച ടാങ്കറുകളില്‍ കുടിവെള്ള വിതരണം നടത്തുന്നതിനു് വേണ്ട ടെക്‍നിക്കല്‍ സൊലൂഷന്‍ – ജി പി എസ് ട്രാക്കിങ് – ടെണ്ടര്‍ ചെയ്തതില്‍ പ്രവൃത്തി ഏറ്റെടുത്തതു് കോഴിക്കോടു് ജാഫര്‍ഖാന്‍ കോളനിക്കടുത്തു് പ്രവര്‍ത്തിക്കുന്ന ഒരു കമ്പനിയായിരുന്നു. അവര്‍ തന്നെ വികസിപ്പിച്ച https://avlview.com/ എന്ന സോഫ്റ്റ്‌വെയര്‍ ടൂളുപയോഗിച്ചാണിതു ചെയ്തതു്. അവര്‍ വാഹനങ്ങളില്‍ Teltonika എന്ന കമ്പനിയുടെ ജി എന്‍ എസ് എസ് ട്രാക്കറുകളാണുപയോഗിച്ചതെന്ന വിവരവും കിട്ടി.

കെല്‍ട്രോണില്‍ വിവരമന്വേഷിച്ചപ്പോള്‍ അവര്‍ക്കു് മുമ്പു് ഇതിനായുള്ള ഹാര്‍ഡ്‌വെയര്‍ ഉപകരണമുണ്ടായിരുന്നെന്നും അതു് ഒരെണ്ണത്തിനു് 10,000/- രൂപ വിലയുണ്ടായിരുന്നെന്നും, ഇപ്പോള്‍ പ്രൊഡക്‍ഷന്‍ നിര്‍ത്തിയിരിക്കുകയാണെന്നുള്ള വിവരവും കിട്ടി.

ഉപകരണങ്ങള്‍, സ്റ്റാന്‍ഡേര്‍ഡുകള്‍, സോഫ്റ്റ്‌വെയര്‍ പ്രോഗ്രാമുകള്‍

വാഹനങ്ങളില്‍ ഫ്ലീറ്റ് മാനേജ്‌മെന്റിനായി ഘടിപ്പിക്കുന്ന ജി എന്‍ എസ് എസ് (ഗ്ലോബല്‍ നാവിഗേഷന്‍ സാറ്റലൈറ്റ് സിസ്റ്റം), ജി എസ് എം ഉപകരണങ്ങള്‍ക്കു് പൊതുവായുള്ള സവിശേഷതകള്‍ പറയാം.

ഈ ഉപകരണം വാഹനത്തിന്റെ ഇഗ്നിഷന്‍ വയറിനോടും ബാറ്ററി വയറിനോടും ഘടിപ്പിക്കുകയാണു് ചെയ്യുന്നതു്. വാഹനത്തില്‍ ഘടിപ്പിക്കുമ്പോള്‍ മുതല്‍ ഉപകരണം ഓണാവും. ഇവ ജി എന്‍ എസ് എസ് റിസീവറുകളായതിനാല്‍ സാറ്റലൈറ്റുകളില്‍ നിന്നു് ലൊക്കേഷന്‍ വിവരങ്ങള്‍ ശേഖരിക്കുകയും, അതിലെ സിം കാര്‍ഡു വഴി ലൊക്കേഷന്‍ ഡാറ്റ, സോഫ്റ്റ് വെയര്‍ സ്ഥാപിച്ചിരിക്കുന്ന സെര്‍വ്വറിലേക്കു് നിശ്ചിത ഇടവേളകളില്‍ അയച്ചു കൊണ്ടിരിക്കുകയും ചെയ്യും. സോഫ്റ്റ്‌വെയറില്‍ വാഹനത്തിന്റെ അതാതു സമയത്തെ പൊസിഷനും മറ്റു വിവരങ്ങളും ഒരു ജി ഐ എസ് മാപ്പില്‍ സ്ക്രീനില്‍ കാണാം. സോഫ്റ്റ്‌വെയര്‍ പ്രോഗ്രാമില്‍ നിന്നു് വാഹനത്തിന്റെ ലോഗും കിട്ടും. അങ്ങനെ സോഫ്റ്റ്‌വെയര്‍ വഴി റിയല്‍ടൈം വെഹിക്കിള്‍ ട്രാക്കിങ് സാദ്ധ്യമാകുന്നു. വാഹനത്തില്‍ നിന്നു് ഉപകരണം അഴിച്ചെടുക്കുമ്പോള്‍ ഓഫാവുകയും ചെയ്യും. മിക്ക ഉപകരണങ്ങളിലും ഓഫ്‌ലൈന്‍ ട്രാക്കിങ്ങിനായി ലൊക്കേഷന്‍ ഡാറ്റ (അഥവാ ജി പി എസ് ട്രാക്കുകള്‍) സൂക്ഷിക്കാന്‍ ഒരു മൈക്രോ എസ് ‍ഡി കാര്‍ഡും ഉണ്ടായിരിക്കും. ട്രാക്കറുകളുടെ മോഡല്‍ മാറുന്നതിനനുസരിച്ചു് കൂടുതല്‍ കൂടുതല്‍ ഫീച്ചറുകള്‍ ഉണ്ടായിരിക്കുന്നതാണു്. ഫീച്ചറുകള്‍ കൂടുന്നതിനനുസരിച്ചു് ഉപകരണത്തിന്റെ വിലയും കൂടും.

നമുക്കു് മാര്‍ക്കറ്റില്‍ കിട്ടുന്ന ഏതു ട്രാക്കറുകളും ഉപയോഗിക്കാമോ? പാടില്ലെന്നാണു് എന്റെ അറിവു്.

കേന്ദ്ര സര്‍ക്കാരിന്റെ റോഡ് ട്രാന്‍സ്പോര്‍ട്ട് ആന്‍ഡ് ഹൈവേയ്സ് മന്ത്രാലയം 2016 നവംബര്‍ 28നു് G.S.R. 1095(E) നമ്പ്രായി ഗസറ്റില്‍ വിജ്ഞാപനം ചെയ്ത സെന്‍ട്രല്‍ മോട്ടോര്‍ വെഹിക്കിള്‍സ് (ഇരുപതാം ഭേദഗതി) റൂള്‍സ്-2016, 2018 ഏപ്രില്‍ 1മുതല്‍ പ്രാബല്യത്തില്‍ വന്നു. ഈ ഭേദഗതി ചട്ടങ്ങള്‍ പ്രകാരം എല്ലാ പബ്ലിക്‍ സര്‍വ്വീസ് വാഹനങ്ങളിലും (ഇരുചക്ര വാഹനങ്ങള്‍, ഇ-റിക്ഷ, മുച്ചക്ര വാഹനങ്ങള്‍, പെര്‍മിറ്റ് വേണ്ടതില്ലാത്ത മറ്റു വാഹനങ്ങള്‍ എന്നിവയൊഴികെ) വെഹിക്കിള്‍ ലൊക്കേഷന്‍ ട്രാക്കിങ് ഡിവൈസുകളും എമര്‍ജന്‍സി ബട്ടണുകളും ഘടിപ്പിച്ചിരിക്കണമെന്നു് പറയുന്നു.

ഈ ഭേദഗതി ചട്ടങ്ങള്‍ താഴെ കണ്ണിയില്‍ ലഭ്യമാണു്.

http://egazette.nic.in/WriteReadData/2016/172814.pdf

ഈ വെഹിക്കിള്‍ ട്രാക്കിങ് ഡിവൈസുകളുടെ സ്പെസിഫിക്കേഷന്‍ Automotive Research Association of India തയ്യാറാക്കിയ AIS-140:2016 എന്ന സ്റ്റാന്‍ഡേര്‍ഡ് പ്രകാരമായിരിക്കേണ്ടതാണെന്നും പറയുന്നു. ഈ സ്റ്റാന്‍ഡേര്‍ഡിന്റെ അന്തിമ കരടു് താഴെ കണ്ണിയില്‍ ലഭ്യമാണു്.

https://araiindia.com/hmr/Control/AIS/68201793238AMFinal_Draft_AIS_140.pdf

ഈ ഭേദഗതി ചട്ടങ്ങളുടെ ചുവടു പിടിച്ചു് കേരള സര്‍ക്കാരിന്റെ ട്രാന്‍സ്പോര്‍ട്ട് (ബി) വകുപ്പു് 2017 ആഗസ്ത് 30നു് നം. B2/106/2017-TRANS നമ്പ്രായി കേരള മോട്ടോര്‍ വെഹിക്കിള്‍സ് റൂള്‍സ്-1989 ഉം ഇതേ പ്രകാരം ഭേദഗതി ചെയ്തു. കേരള സര്‍ക്കാര്‍ ഒരു പടി കൂടി കടന്നു് എല്ലാ ഗുഡ്സ് കാര്യേജ് വാഹനങ്ങളിലും കൂടി ലൊക്കേഷന്‍ ട്രാക്കിങ് ഡിവൈസുകള്‍‍ ഘടിപ്പിക്കണമെന്നു് ചട്ടത്തില്‍ ചേര്‍ത്തു, ഇതു് ഉടനടി പ്രാബല്യത്തില്‍ വരുന്നതാണെന്നും.

നോട്ടിഫിക്കേഷന്‍ താഴെ കണ്ണിയില്‍.

https://www.kerala.gov.in/documents/10180/71efd727-725f-481c-be3f-c1dd803ed039

AIS-140:2016 സ്റ്റാന്‍ഡേര്‍ഡ് പ്രകാരം നിര്‍മ്മിച്ച ട്രാക്കറുകള്‍ ഇപ്പോള്‍ വിപണിയില്‍ ലഭ്യമായിത്തുടങ്ങിയിട്ടുണ്ടു്.

സംഗതികളുടെ കിടപ്പു് ഈവിധമൊക്കെയായതിനാല്‍ ഗ്രാമപഞ്ചായത്തുകളും മുനിസിപ്പാലിറ്റികളും കോര്‍പ്പറേഷനുകളും ഈ പ്രാവശ്യം മുതല്‍ കുടിവെള്ളം വിതരണം ചെയ്യുന്ന ടാങ്കറുകളിലും AIS-140:2016 സ്റ്റാന്‍ഡേര്‍ഡ് പ്രകാരം നിര്‍മ്മിച്ച ട്രാക്കറുകള്‍ ഘടിപ്പിക്കേണ്ടി വരുമെന്നു തോന്നുന്നു. കൂടാതെ ഇതിന്റെ മോണിറ്ററിങ് നടത്തുന്നതിനുള്ള സംവിധാനവും ജി പി എസ് ട്രാക്കിങ്ങിനുള്ള സംവിധാനവും (സോഫ്റ്റ്‌വെയര്‍ പ്രോഗ്രാം) അതാതു് തദ്ദേശസ്വയംഭരണ സ്ഥാപനങ്ങളുടെ ജില്ലാതല മേധാവികള്‍ ഏര്‍പ്പെടുത്തേണ്ടതായിട്ടുണ്ടെന്നും.

വെഹിക്കിള്‍ ട്രാക്കിങ്ങിനു് സ്വതന്ത്ര സോഫ്റ്റ്‌വെയറും അല്ലാത്തതുമായ നിരവധി സൊലൂഷനുകള്‍ ലഭ്യമാണു്. സര്‍ക്കാരിന്റെ നയവും ഉത്തരവുകളും സ്വതന്ത്ര സോഫ്റ്റ്‌വെയര്‍ സംവിധാനങ്ങളെയാണു് ശുപാര്‍ശ ചെയ്യുന്നതെന്നതിനാല്‍ അവ തന്നെ ചര്‍ച്ച ചെയ്യാം.

  1. Traccar എന്ന സോഫ്റ്റ്‌വെയര്‍ പ്രോഗ്രാം ആണു് ഇവയില്‍ പ്രധാനം. ഇതിനെ നമ്മുടെ ആവശ്യങ്ങള്‍ക്കനുസരിച്ചു് കസ്റ്റമൈസ് ചെയ്യുകയും ആവാം. കമ്പ്യൂട്ടറില്‍ കൂടിയും സ്മാര്‍ട്ട് ഫോണിലൂടെയും ടാബ്‌ലെറ്റ് വഴിയും ട്രാക്കിങ് നടത്താം. നിരവധി ട്രാക്കര്‍ ഡിവൈസുകളെ ഇതു സപ്പോര്‍ട്ടു് ചെയ്യുന്നുണ്ടു്. വെബ്ബ് സൈറ്റ് – https://www.traccar.org/traccar_1
  2. അടുത്തതു് OpenGTS ആണു്. ഇതു് Traccarന്റെ അത്ര പോരെങ്കിലും ആവശ്യത്തിനു് ഇതും മതിയാവും. കസ്റ്റമൈസ് ചെയ്യാനും പറ്റും. കോഡിങ് കുറച്ചു കൂടുതല്‍ നടത്തേണ്ടി വരുമെന്നതാണു് പോരായ്മ. കണ്ണി – http://www.opengts.org/TrackMap
  3. ഞാന്‍ മുമ്പു് സര്‍ക്കാരിലേക്കു് എഴുതിയയച്ച റിപ്പോര്‍ട്ടില്‍ പരാര്‍ശിച്ച സ്വതന്ത്ര ഇ ആര്‍ പി സോഫ്റ്റ്‌വെയര്‍ പ്രോഗ്രാമായ ഓപ്പണ്‍ ഇആര്‍പിയുടെ പുതിയ രൂപമായ Odoo വില്‍ ഫ്ലീറ്റ് മാനേജ്‌മെന്റിനു് പ്രത്യേകം മൊഡ്യൂള്‍ തന്നെയുണ്ടു്. ഈ കണ്ണിയില്‍ അതു് ലഭ്യമാണു് – https://www.odoo.com/page/fleet ഞാന്‍ എന്റെ ഈ കണ്ണിയിലെ റിപ്പോര്‍ട്ടില്‍ സൂചിപ്പിച്ചതു പ്രകാരം നമുക്കു് Odoo ഉപയോഗിച്ചു് ഇആര്‍പി അധിഷ്ഠിതമായ ഓഫീസ് മാനേജ്‌മെന്റ് സംവിധാനമുണ്ടായിരുന്നുവെങ്കില്‍ ഈ മൊഡ്യൂള്‍ അതില്‍ സംയോജിപ്പിച്ചാല്‍ മാത്രം മതിയാകുമായിരുന്നു. വളരെ ആയാസരഹിതമായി ഇക്കാര്യം നമുക്കു് കൈകാര്യം ചെയ്യാന്‍ കഴിഞ്ഞേനെ. datas

ഇവ കൂടാതെ വേറെയും സോഫ്റ്റ്‌വെയര്‍ സംവിധാനങ്ങള്‍ നിലവിലുണ്ടു്.

സൊലൂഷന്‍

ഇപ്പോള്‍ ഇവയില്‍ നമുക്കു പറ്റിയ സോഫ്റ്റ്‌വെയര്‍ പ്രോഗ്രാം ഒരു സെന്‍ട്രലൈസ്ഡ് സെര്‍വ്വറില്‍ ഹോസ്റ്റ് ചെയ്യേണ്ടതായിട്ടുണ്ടു്. എല്ലാ ലോക്കല്‍ അതോറിറ്റികള്‍ക്കും വേണ്ടി ഇവയിലേതെങ്കിലും സോഫ്റ്റ്‌വെയര്‍ പ്രോഗ്രാം തെരഞ്ഞെടുത്തു് കസ്റ്റമൈസ് ചെയ്തു് സ്ഥാപിച്ചു് എല്ലാ ലോക്കല്‍ അതാറിറ്റികള്‍ക്കും ലോഗിന്‍ കൊടുക്കുന്നതാവും മികച്ച സൊലൂഷന്‍. സംസ്ഥാന തലത്തില്‍ പ്രവര്‍ത്തനം മോണിറ്റര്‍ ചെയ്യാനും സാധിക്കും. ഐ കെ എം, ഐ ടി മിഷന്‍ എന്നീ ഏജന്‍സികള്‍ക്കു് ഇതു് സാധിക്കാവുന്നതേയുള്ളൂ.

തദ്ദേശസ്വയംഭരണസ്ഥാപനങ്ങള്‍ ഏതുപകരണം വാങ്ങണമെന്നു് ഈ സാങ്കേതിക ഏജന്‍സികള്‍ ശുപാര്‍ശ ചെയ്യകയും, അതു് തദ്ദേശ സ്വയംഭരണ സ്ഥാപനങ്ങള്‍ വാങ്ങി വാഹനത്തില്‍ ഘടിപ്പിക്കുകയും ചെയ്താല്‍ പ്രശ്നം തീര്‍ന്നു. അല്ലാതെ, ഓരോരുത്തരും തങ്ങള്‍ക്കു തോന്നിയപടി ഉപകരണങ്ങള്‍ വാങ്ങി ഉപയോഗിച്ചാല്‍ സംഗതി ആകെ കുഴയും.

സാദ്ധ്യതകള്‍

ഈ ഉത്തരവുകളും ഭേദഗതി ചട്ടങ്ങളും സ്റ്റാന്‍ഡേര്‍ഡുമൊക്കെ കണ്ടപ്പോള്‍ ഇതിന്റെ സാദ്ധ്യതകളാണു് എന്റെ മനസ്സിലൂടെ കടന്നു പോയതു്.

കഴിഞ്ഞ വര്‍ഷം റവന്യൂ വകുപ്പുകാര്‍ (കോഴിക്കോടു് ജില്ലയില്‍) സ്വകാര്യ കമ്പനിയെയാണു് ഇതിനായി ആശ്രയിച്ചതു്. ഡാറ്റ ശേഖരിക്കുന്നതു് അവരുടെ സെര്‍വ്വറില്‍. റവന്യൂ ഉദ്യോഗസ്ഥര്‍ക്കു് ലോഗിന്‍ മാത്രം. ഞാനാലോചിക്കുന്നതു്, സാങ്കേതികമായി ഇതത്രയ്ക്കൊന്നും ബുദ്ധിമുട്ടുള്ള കാര്യമല്ലാഞ്ഞിട്ടു കൂടി എന്തുകൊണ്ടു് നമ്മുടെ സര്‍ക്കാര്‍ സംവിധാനങ്ങള്‍ക്കു് ഇതു് സാധിച്ചില്ലെന്നാണു്.

ഐ കെ എമ്മിന്റെ കൈവശം ഇപ്പോള്‍ തദ്ദേശസ്വയംഭരണസ്ഥാപനങ്ങളുടെ പരിധിയിലെ റോഡ് ഡാറ്റയില്ലെന്നാണു് കരുതുന്നതു്. (എന്തിനു് നമ്മുടെ സര്‍ക്കാര്‍ സംവിധാനങ്ങളുടെ കൈവശം തദ്ദേശസ്വയംഭരണസ്ഥാപനങ്ങളുടെ അപ്റ്റുഡേറ്റായ ബൌണ്ടറി ഡാറ്റ പോലുമില്ലെന്ന പരിതാപകരമായ അവസ്ഥയാണുള്ളതു്). മേല്‍പ്പറഞ്ഞ കുടിവെള്ള വിതരണ ട്രാക്കിങ് ആവശ്യത്തിലേക്കായി ഐ കെ എമ്മാണു് സെര്‍വ്വര്‍ തയ്യാറാക്കുന്നതെങ്കില്‍ എളുപ്പത്തില്‍ റോഡ് ഡാറ്റ കിട്ടാനുള്ള ഒരുപാധിയായി അതിനെ ഉപയോഗിക്കാം. കൂടാതെ, കുടിവെള്ള വിതരണം ഈവിധം നടത്തിക്കഴിഞ്ഞാല്‍, ഇതിന്റെ ജി പി എസ് ട്രാക്ക് ഡാറ്റ സംസ്ഥാനവ്യാപകമായി കുടിവെള്ളക്ഷാമമുള്ളയിടങ്ങളുടെയും കുടിവെള്ളക്ഷാമത്തിന്റെ തീവ്രതയുടെയും വിശദമായ പ്രാഥമിക വിവരസ്രോതസ്സായി ഉപയോഗിക്കാം. ഈ ഡാറ്റയുപയോഗിച്ചു് വിശദമായ അനാലിസിസും നടത്താം. തൊഴിലുറപ്പു് പദ്ധതിയില്‍ നീര്‍ത്തടങ്ങള്‍ അടിസ്ഥാനമാക്കിയുള്ള മണ്ണുജലസംരക്ഷണ പ്രവര്‍ത്തനങ്ങള്‍ ഗ്രാമീണ തദ്ദേശസ്വയംഭരണസ്ഥാപനങ്ങള്‍ നടത്തിവരുന്നുണ്ടല്ലോ. എവിടെയൊക്കെയാണ് കൃത്യമായി ഇത്തരം ഇടപെടല്‍ പ്രവര്‍ത്തനങ്ങള്‍ നടത്തി ജലസംരക്ഷണം ഉറപ്പു വരുത്തേണ്ടതെന്ന വിവരം ഈ ഡാറ്റയില്‍ നിന്നു് കിട്ടുകയും ചെയ്യും. അങ്ങനെ ഉചിതമായ ഇടങ്ങളില്‍ ഇടപെടലുകള്‍ നടത്തി വരും വര്‍ഷങ്ങളില്‍ ആയിടങ്ങളില്‍ വരള്‍ച്ചയുടെ രൂക്ഷത കുറയ്ക്കുന്നതോടൊപ്പം സര്‍ക്കാര്‍ ഫണ്ടിന്റെ കാര്യക്ഷമമായ വിനിയോഗം ഉറപ്പാക്കുകയും ചെയ്യാം.

തദ്ദേശസ്വയംഭരണസ്ഥാപനങ്ങളുടെ ഔദ്യോഗിക വാഹനങ്ങള്‍ക്കും ഈവിധം ട്രാക്കറുകള്‍ ഘടിപ്പിക്കുന്നതായാല്‍ അവയുടെ നിലവിലുള്ള ലോഗ്‌ബുക്കിനു പകരം ജിപിഎസ് അധിഷ്ഠിത ലോഗാക്കി മാറ്റി കൃത്യമായ മോണിറ്ററിങ് നടത്തി ഔദ്യോഗിക വാഹനങ്ങളുടെ ദുരുപയോഗം തടയാം.

ഔദ്യോഗിക വാഹനങ്ങളുടെ ട്രാക്കറുകളില്‍ നിന്നു് കിട്ടുന്ന റോഡ് ഡാറ്റ തദ്ദേശസ്വയംഭരണസ്ഥാപനങ്ങളുടെ ആസ്തിരജിസ്റ്ററുമായി സംയോജിപ്പിച്ചു് റോഡുകളുടെയും ലെയിനുകളുടെയും വിവരങ്ങള്‍ കൃത്യമാക്കാം.

അങ്ങനെ നിരവധിയനവധി സാദ്ധ്യതകള്‍… സ്വപ്നം കാണുന്നതിനു് പ്രത്യേകിച്ചു് ചെലവൊന്നുമില്ലല്ലോ… അതു കൊണ്ടിങ്ങനെയിങ്ങനെ…

(ചിത്രങ്ങളുടെ പകര്‍പ്പവകാശം അതാതു സോഫ്റ്റ്‌വെയര്‍ പ്രോഗ്രാം നിര്‍മ്മാതാക്കള്‍ക്കു് / പ്രൊജക്ടുകള്‍ക്കു്)

Advertisements

ഒരു മറുപടി കൊടുക്കുക

Fill in your details below or click an icon to log in:

WordPress.com Logo

You are commenting using your WordPress.com account. Log Out /  മാറ്റുക )

Google+ photo

You are commenting using your Google+ account. Log Out /  മാറ്റുക )

Twitter picture

You are commenting using your Twitter account. Log Out /  മാറ്റുക )

Facebook photo

You are commenting using your Facebook account. Log Out /  മാറ്റുക )