തളിപ്പറമ്പു് ഡയറി

ഇക്കഴിഞ്ഞ ഒക്ടോബര്‍ 15, 16, 17 തീയ്യതികളില്‍ ഞാന്‍ തളിപ്പറമ്പിലായിരുന്നു. ക്ഷേമകാര്യ സ്റ്റാന്റിങ് കമ്മിറ്റി ചെയര്‍മാനും അംഗങ്ങള്‍ക്കും, അസിസ്റ്റന്റ് സെക്രട്ടറി, ഐ സി ഡി എസ് സൂപ്പര്‍വൈസര്‍, വില്ലേജ് എക്സ്റ്റെന്‍ഷന്‍ ഓഫീസര്‍ എന്നിവര്‍ക്കും വേണ്ടി കില ഒരുക്കിയ ഒരു ട്രെയിനിങ് പരിപാടി. വി ഇ ഒയ്ക്കു് എന്തോ കാരണത്താല്‍ പങ്കെടുക്കാന്‍ കഴിഞ്ഞില്ല. ക്ഷേമകാര്യസ്റ്റാന്റിങ് കമ്മിറ്റിയും, ക്ഷേമപ്രവര്‍ത്തനങ്ങളുമെന്നതായിരുന്നു വിഷയം. തളിപ്പറമ്പു് എക്സ്റ്റെന്‍ഷന്‍ ട്രെയിനിങ് സെന്ററിലായിരുന്നു (ഇ ടി സി) ട്രെയിനിങ് ഏര്‍പ്പാടാക്കിയിരുന്നതു്. രാവിലെ 9.30നു തന്നെ പരിപാടി ആരംഭിക്കുമെന്നു് അറിയിപ്പു് കിട്ടിയിരുന്നതിനാലും, രാവിലെ നേരത്തെ എണീക്കുന്ന ശീലം എനിക്കില്ലാത്തതു കൊണ്ടും ഞാന്‍ തലേന്നു് ഉച്ച തിരിഞ്ഞപ്പോള്‍ത്തന്നെ മൂന്നു ദിവസത്തേക്കുള്ള സാധനസാമഗ്രികളെല്ലാം കെട്ടിപ്പെറുക്കി തളിപ്പറമ്പിലേക്കു് പുറപ്പെട്ടു. ചെയര്‍മാനും കൂട്ടരും പിറ്റേന്നേ ഉള്ളൂവെന്നു് പറഞ്ഞു. ആദ്യമായിട്ടാണു് തളിപ്പറമ്പു് ഇ ടി സിയില്‍ പോവുന്നതു്. വലിയ പാരമ്പര്യമുള്ള സ്ഥാപനമാണു്. എം ടി വാസുദേവന്‍ നായര്‍ക്കു് വി ഇ ഒ ആയി പോസ്റ്റിങ് കിട്ടിയപ്പോള്‍ ട്രെയിനിങ്ങിനു് വന്നതു് ഇവിടെയായിരുന്നത്രേ. എന്റെ ആപ്പനും വി ഇ ഒ ട്രെയിനിങ് പൂര്‍ത്തിയാക്കി പുറത്തിറങ്ങിയതു് ഇവിടുന്നു തന്നെ. കൊയിലാണ്ടിയില്‍ നിന്നു് ഓടിപ്പാഞ്ഞു കേറിയതു് തലശ്ശേരിക്കുള്ള ബസ്സില്‍. തലശ്ശേരിയില്‍ നിന്നു് കണ്ണൂര്‍ക്കും, അവിടെ നിന്നു് തളിപ്പറമ്പിലേക്കും വേറെ വേറെ ബസ്സുകളില്‍. വളപട്ടണം പാലത്തിലെത്തിയപ്പോള്‍ അതിന്റെ അറ്റകുറ്റപ്പണി നടക്കുകയായിരുന്നതിനാല്‍ വളരെ നേരം ബ്ലോക്കില്‍പ്പെട്ടു കിടക്കേണ്ടി വന്നു. അങ്ങനെ തളിപ്പറമ്പില്‍ എത്തിയപ്പോഴേക്കും സമയം രാത്രി മണി 9.30. പിന്നെയങ്ങോട്ടു് ബസ്സുകളൊന്നുമുണ്ടാവില്ലെന്നു് അറിവു കിട്ടിയതിനാലും, 9 മണിക്കു തന്നെ ഇ ടി സിയില്‍ ഭക്ഷണസമയം കഴിയുമെന്നു് അറിയിപ്പു കിട്ടീരുന്നതിനാലും തളിപ്പറമ്പു് ടൗണിലെ ഒരു ഹോട്ടലില്‍ നിന്നു് രാത്രി ഭക്ഷണം കഴിച്ചു് ഒരു ഓട്ടോ പിടിച്ചു് ഇ ടി സിയുടെ മുന്നില്‍ വന്നിറങ്ങി. ഗേറ്റു കടന്നു് ഇ ടി സിയിലെ രജിസ്ട്രേഷനു മുന്നിലെത്തിയപ്പോള്‍ കണ്ടയാളോടു് ട്രെയിനിങ്ങിനു വന്നതാണെന്നു പറഞ്ഞു. പുള്ളി വേഗം തന്നെ കിടക്കവിരിയും, തലയിണയുറയും എടുത്തു തന്നു, താമസിക്കാനുള്ള മുറിയും കാണിച്ചു തന്നു. മൂന്നു പേര്‍ക്കുള്ള മുറിയില്‍ നേരത്തേ വന്നെത്തിയ രണ്ടുപേരുണ്ടു്. പരിചയപ്പെട്ടു, മലപ്പുറത്തെ അമരമ്പലം ഗ്രാമപഞ്ചായത്തു് ക്ഷേമകാര്യ സ്റ്റാന്റിങ് കമ്മിറ്റി ചെയര്‍മാന്‍ സുരേഷും സ്റ്റാന്റിങ് കമ്മിറ്റി മെമ്പര്‍ ബിജുവും. അവര്‍ ചെയര്‍മാന്റെ സ്വന്തം കാറിലാണു് അമരമ്പലത്തു നിന്നും ട്രെയിനിങ്ങിനു് വന്നതു്. മുറിയും ആകപ്പാടെയുള്ള ചുറ്റുപാടുകളും കണ്ടതോടെ പുറപ്പെടുംമുമ്പേ മനസ്സില്‍ തോന്നിയ ഉന്നത വികാരവിചാരങ്ങളെല്ലാം ആവിയായിപ്പോയി. കുടുസ്സു മുറി. കഷ്ടി രണ്ടാള്‍ക്കു താമസിക്കാവുന്ന മുറിയിലാണു് മൂന്നു പേര്‍ ഞെരുങ്ങി താമസിക്കേണ്ടതു്. ഇതുപോലത്തെ നാലു മുറികള്‍ക്കു് രണ്ടു കോമണ്‍ ബാത്ത് റൂമുകള്‍. മുറിയിലെ ഫര്‍ണ്ണിച്ചറുകളും വയറിങ്ങും ബാത്ത്റൂമുകളിലെ പ്ലംബിങ്ങും എല്ലാം സബ്ബ് സ്റ്റാന്റേര്‍ഡ്. മൊബൈല്‍ ഫോണ്‍ പ്ലഗ്ഗില്‍ ചാര്‍ജ്ജു ചെയ്യാനായി കുത്തി ഓണ്‍ ചെയ്യുമ്പോഴേക്കും ആ ഭാഗത്തേക്കുള്ള സര്‍ക്യൂട് ബ്രേക്കാവും. കുളിമുറിയില്‍ കുളിക്കുമ്പോഴേക്കും വെള്ളപ്പൊക്കം – നേര്‍ത്ത ഡ്രെയിനേജ് പൈപ്പ് ബ്ലോക്കായതാണു്. ടോയ്‌ലെറ്റ് ഫ്ലഷ് പ്രവര്‍ത്തിക്കുന്നില്ല. കാടുപിടിച്ചു കിടക്കുന്ന വളപ്പില്‍ അങ്ങിങ്ങായി പ്രത്യേകിച്ചു് പ്ലാനിങ്ങൊന്നുമില്ലാതെ പല കാലങ്ങളില്‍ കെട്ടിപ്പൊക്കിയ കെട്ടിടങ്ങള്‍. മൂന്നു ദിവസത്തെ കേസു കെട്ടല്ലേയുള്ളൂ, ഒപ്പിക്കാമെന്നു കരുതി.

പിറ്റേന്നു് രാവിലെ അമരമ്പലം പഞ്ചായത്തു് ചെയര്‍മാനും മെമ്പറും തളിപ്പറമ്പു് രാജരാജേശ്വര ക്ഷേത്രത്തില്‍ പോവുന്നെന്നു പറഞ്ഞു. ഞാനും കുളിച്ചു പുറപ്പെട്ടു് കൂടെക്കൂടി. മുമ്പേ ഇവിടെ വന്നതാണെങ്കിലും, ഒരവസരം കിട്ടുമ്പോ പാഴാക്കരുതല്ലോ. തമിഴ്‌നാടു് മുഖ്യമന്ത്രി ജയലളിത, ശ്രീലങ്കന്‍ പ്രസിഡണ്ട് മഹിന്ദ രാജപക്സെ തുടങ്ങിയ മഹാരഥന്മാരൊക്കെ സന്ദര്‍ശിച്ചിട്ടുള്ള സ്ഥലമാണു്. ക്ഷേത്രത്തില്‍ ചെന്നു് പടങ്ങളൊക്കെയെടുത്തു.

തിരികെയെത്തിയപ്പോള്‍ രജിസ്ട്രേഷനും മറ്റും സമയമാവുന്നേയുള്ളൂ. പരിപാടി തുടങ്ങി കുറച്ചു കഴിഞ്ഞാണു് ഞങ്ങടെ ചെയര്‍മാനും സംഘവും എത്തുന്നതു്. വളപട്ടണം പാലത്തിലെ ബ്ലോക്കില്‍പെട്ടതായിരുന്നെന്നു പറഞ്ഞു.

തുടര്‍ന്നു് പ്രീ ടെസ്റ്റ് കഴിഞ്ഞു് മൂന്നു ദിവസങ്ങളിലായി, സ്റ്റാന്റിങ് കമ്മിറ്റിയുടെ കേരളത്തിലെ സവിശേഷതകള്‍, ചുമതലകള്‍, ഉത്തരവാദിത്തങ്ങള്‍, ക്ഷേമകാര്യ സ്റ്റാന്റിങ് കമ്മിറ്റിയും പദ്ധതി പ്രവര്‍ത്തനങ്ങളും, പദ്ധതി നിര്‍വ്വഹണവും മോണിറ്ററിങ്ങും, കുട്ടികളുടെ സമഗ്ര വികസനം, കുട്ടികളുടെ സംരക്ഷണ സംവിധാനങ്ങള്‍, വനിതാ വികസനം, വയോജനക്ഷേമം, ഭിന്നശേഷിക്കാരുടെ ക്ഷേമം, പട്ടികജാതി വികസനം, പട്ടികവര്‍ഗ്ഗ വികസനം, ദാരിദ്ര്യ നിര്‍മ്മാര്‍ജ്ജനം, സാമൂഹ്യസുരക്ഷാ പദ്ധതികള്‍, ക്ഷേമപെന്‍ഷനുകള്‍, നേതൃത്വശേഷി പരിശീലനം, സ്ത്രീകളുടെയും കുട്ടികളുടെയും നിയമപരിരക്ഷ എന്നീ വിഷയങ്ങളിലാണു് ക്ലാസുകളുണ്ടായിരുന്നതു്. ആദ്യത്തെ രണ്ടു ദിവസവും രാവിലെ 9.30 നു് തുടങ്ങി വൈകുന്നേരം 7.30 വരെ ക്ലാസുകളാണു്. രണ്ടാം ദിവസം ക്ലാസു കഴിഞ്ഞു് ഒരു ക്യാമ്പ് ഫയറും ഏര്‍പ്പാടാക്കിയിരുന്നു. മൂന്നാം ദിവസം ഉച്ചയോടെ ക്ലാസുകള്‍ തീര്‍ന്നു. തുടര്‍ന്നു് പരിശീലിച്ച കാര്യങ്ങളടിസ്ഥാനപ്പെടുത്തി ഒരു ആക്ഷന്‍ പ്ലാനും തയ്യാറാക്കി പിരിഞ്ഞു.

തളിപ്പറമ്പു് ഇ ടി സിയിലെ ഭക്ഷണം വളരെ മെച്ചമെന്നു് പറഞ്ഞുകൂടാ, ഒപ്പിക്കാമെന്നേയുള്ളൂ. ക്ലാസു നടത്തിയ ഓഡിറ്റോറിയത്തിന്റെ മേല്‍ക്കൂരയൊക്കെ കാലപ്പഴക്കം കൊണ്ടു് അടര്‍ന്നു പോയിത്തുടങ്ങിയിട്ടുണ്ടു്. ആദ്യമായിട്ടിവിടെ വച്ചാണു് ഞാന്‍ വാഴകളിന്മേല്‍ കൂമ്പില്ലാത്ത വാഴക്കുല കാണുന്നതു്. ചുണ്ടില്ലാക്കണ്ണനെന്ന ഇനമാണത്രേ. പടമെടുത്തു.

ക്ലാസ്സ് പ്രതീക്ഷിച്ചതിലും നേരത്തേ കഴിഞ്ഞപ്പോള്‍ തളിപ്പറമ്പില്‍ത്തന്നെയുള്ള റൂഡ്സെറ്റി എന്ന ഇന്‍സ്റ്റിറ്റ്യൂട്ടിനെപ്പറ്റി ഓര്‍മ്മ വന്നു. അവിടെയൊന്നു് പോയ്ക്കളയാമെന്നു കരുതി. ഇ ടി സിയില്‍ നിന്നിറങ്ങി മന്ന ജംഗ്ഷനിലേക്കു് ഓട്ടോയില്‍ പോയി അവിടെനിന്നു് കുടിയാന്മലയ്ക്കുള്ള ബസ്സില്‍ കയറി കാഞ്ഞിരങ്ങാടു് ടെസ്റ്റ് ഗ്രൗണ്ട് സ്റ്റോപ്പില്‍ ഇറങ്ങി. അവിടെ നിന്നു് നേരെ നോക്കിയാല്‍ത്തന്നെ സ്ഥാപനം കാണാം. ചെന്നു് സ്വയം പരിചയപ്പെടുത്തി അതിന്റെ ഡയറക്‍ടര്‍ ശ്രീ രാജ്കുമാറുമായി സംസാരിച്ചു. സ്ഥാപനം മുഴുവന്‍ ചുറ്റിനടന്നു കണ്ടു. വളരെ നല്ല നിലയില്‍ നടക്കുന്ന ഒരു കേന്ദ്ര സര്‍ക്കാര്‍ സ്ഥാപനം.

റൂഡ്സെറ്റി കണ്ടു കഴിഞ്ഞു് തിരികെ ബസ്സു പിടിച്ചു് വീട്ടില്‍ മടങ്ങിയത്തിയപ്പോള്‍ സമയം രാത്രി 10 മണി കഴിഞ്ഞിരുന്നു.

കോഴിക്കോടു് ജില്ലയില്‍ പ്രവര്‍ത്തിക്കുന്ന റൂഡ്സെറ്റിയുടെ മാതൃകയിലുള്ള സ്ഥാപനം കൂരാച്ചുണ്ടിലേക്കു് കൊണ്ടു വരുവാനൊരു ശ്രമം ഞാന്‍ നടത്തിയിരുന്നു. അതിനെപ്പറ്റി അല്പം.

റൂറല്‍ ഡെവലപ്പ്മെന്റ് ആന്‍ഡ് സെല്‍ഫ് എംപ്ലോയ്‌മെന്റ് ട്രെയിനിങ് ഇന്‍സ്റ്റിറ്റ്യൂട്ട് എന്നതിന്റെ ചുരുക്കമാണു് റൂഡ്സെറ്റി. ഇതു് ധര്‍മ്മസ്ഥല ധര്‍മ്മാധികാരി ശ്രീ വീരേന്ദ്ര ഹെഗ്ഗഡെയുടെ നേതൃത്വത്തില്‍ ശ്രീ ധര്‍മ്മസ്ഥല മഞ്ജുനാഥേശ്വര എജുക്കേഷണല്‍ ട്രസ്റ്റും സിന്‍ഡിക്കേറ്റ് ബാങ്കും സംയുക്തമായി കര്‍ണ്ണാടകയിലെ ഉജിരെ എന്ന സ്ഥലത്തു തുടങ്ങിയ സംരംഭമാണു്. ഗ്രാമീണ യുവജനങ്ങള്‍ക്കു് അവരുടെ അഭിരുചിക്കിണങ്ങിയ സ്വയംതൊഴില്‍ പരിശീലനം നല്കുക എന്നതാണു് ഇന്‍സ്റ്റിറ്റ്യൂട്ടിന്റെ പരിപാടി. അവര്‍ക്കു് പരിശീലനവും, ഭക്ഷണവും താമസവും തികച്ചും സൌജന്യമായിരിക്കും. വിപണി ഡിമാന്റിനനുസരിച്ചും ദാരിദ്ര്യരേഖയ്ക്കു് താഴെയുള്ള യുവജനങ്ങള്‍ക്കു് മുന്‍ഗണന നല്കിയും, വനിതകള്‍ക്കു് തുല്യ പരിഗണനയോടെയും നടത്തുന്ന ഇവിടെത്തെ കോഴ്സുകള്‍ കഴിഞ്ഞു്, ഇവിടുന്നുള്ള സര്‍ട്ടിഫിക്കറ്റോടെ പുറത്തിറങ്ങുന്നവര്‍ക്കു് എല്ലാ ബാങ്കുകളില്‍ നിന്നും സ്വയംതൊഴിലിനു് വായ്പ എളുപ്പത്തില്‍ ലഭ്യമാക്കുന്ന തരത്തിലുള്ളതാണു് പഠന പരിപാടി. കൃഷി, ഉല്പാദനം, സര്‍വ്വീസുകള്‍ തുടങ്ങിയവയില്‍ ഏറ്റവും പുതിയ വിവരങ്ങള്‍ വരെ ഉള്‍പ്പടുത്തിക്കൊണ്ടുള്ളതാണു് പാഠ്യപദ്ധതി. ഈ പരിപാടിയുടെ വിജയം കണ്ടു് ഈ മാതൃകയില്‍ രാജ്യത്തെ എല്ലാ ജില്ലകളിലും ഇതുപോലത്തെ ഇന്‍സ്റ്റിറ്റ്യൂട്ടുകള്‍ ആര്‍സെറ്റി (റൂറല്‍ സെല്‍ഫ് എംപ്ലോയ്‌മെന്റ് ട്രെയിനിങ് ഇന്‍സ്റ്റിറ്റ്യൂട്ട്) എന്ന പേരില്‍ തുടങ്ങാന്‍ ഗ്രാമവികസന മന്ത്രാലയം തീരുമാനിക്കുകയും ചെയ്തു. ഇതു സംബന്ധിച്ച ഗ്രാമവികസന മന്ത്രാലയത്തിന്റെ മാര്‍ഗ്ഗരേഖ ഇവിടെ.

05/03/2015 തീയ്യതിയില്‍ ബാലുശ്ശേരി ബ്ലോക്കു് പഞ്ചായത്താപ്പീസ്സില്‍ വച്ചു് നടന്ന ബ്ലോക്ക് ലെവല്‍ ബാങ്കേഴ്സ് കമ്മിറ്റി യോഗത്തില്‍ വച്ചാണു് ആര്‍സെറ്റിയെപ്പറ്റി ഞാനാദ്യമായി കേള്‍ക്കുന്നതു്. ഇതു് അതാതു് ജില്ലകളിലെ ലീഡ് ബാങ്കുമായി സഹകരിച്ചാണു് സ്ഥാപിക്കുക. ഇതിന്നായി സംസ്ഥാന സര്‍ക്കാരും അനുബന്ധ സ്ഥാപനങ്ങളുമാണു് സ്ഥലം അനുവദിച്ചു് നല്കേണ്ടതു്. കോഴിക്കോടു് ജില്ലയിലെ ലീഡ് ബാങ്കു് കനറാ ബാങ്കായതിനാല്‍ അവരുടെ പേരിലുള്ള കനറാ ബാങ്കു് റൂറല്‍ ഡവലപ്പ്മെന്റ് ട്രസ്റ്റിനു് റോഡ് സൌകര്യവും ജലലഭ്യതയുമുള്ള കുറഞ്ഞതു് അന്‍പതു സെന്റെങ്കിലും സ്ഥലം ലീസിനു് വിട്ടുനല്കിയാല്‍ അവിടെ കെട്ടിടം നിര്‍മ്മിച്ചു്, സ്ഥാപനം ഇപ്പോള്‍ പ്രവര്‍ത്തിച്ചു വരുന്ന കോഴിക്കോടു് മാത്തറയിലെ വാടകക്കെട്ടിടത്തില്‍ നിന്നും മാറ്റി പുതിയ കെട്ടിടത്തില്‍ സ്ഥാപിക്കുമെന്നാണറിവായതു്. കൂരാച്ചുണ്ടു് ഗ്രാമപഞ്ചായത്തില്‍ ബാലുശ്ശേരി ബ്ലോക്കു് പഞ്ചായത്തിന്റെ അധീനതയിലുള്ള വ്യവസായ എസ്റ്റേറ്റിനു വേണ്ടി വാങ്ങിയിട്ട സ്ഥലം ഈ സ്ഥാപനത്തിനായി പ്രൊപ്പോസ് ചെയ്യാവുന്നതാണെന്നു് കണ്ടു് ഞാന്‍ പഞ്ചായത്തു് ഭരണസമിതിയില്‍ വിഷയം കുറിപ്പായി നല്കുകയും, ഭരണസമിതി വിഷയത്തില്‍ അനുകൂലതീരുമാനത്തിനായി സ്ഥലത്തിന്റെ ഉടമയായ ബ്ലോക്കു് പഞ്ചായത്തിനോടു് അപേക്ഷിക്കുവാന്‍ തീരുമാനിക്കുകയും ചെയ്തു. പക്ഷേ, ബ്ലോക്കു് പഞ്ചായത്തു് ഇതുവരെ ഇക്കാര്യത്തില്‍ അനുകൂല തീരുമാനമെടുത്തില്ല. ബ്ലോക്കു് പഞ്ചായത്തു് 1998ലോ മറ്റോ ആണു് ഈ സ്ഥലം വ്യവസായ എസ്റ്റേറ്റ് സ്ഥാപിക്കാന്‍ വാങ്ങിയിട്ടതു്. വാങ്ങിയിട്ടിട്ടു് ഇതുവരെ വ്യവസായ എസ്റ്റേറ്റ് തുടങ്ങാത്തതിനാല്‍ അതിന്റെ പേരില്‍ ബ്ലോക്ക് പഞ്ചായത്തിനു് ഓഡിറ്റ് ഒബ്ജക്‍ഷനുമുണ്ടു്. ആര്‍സെറ്റിക്കാണെങ്കില്‍ തൃപ്തികരമായ ഒരു സ്ഥലം ഇതേവരെ കിട്ടീട്ടുമില്ലെന്നാണു് ഈയിടെ അന്വേഷിച്ചപ്പോള്‍ അറിഞ്ഞതു്. രണ്ടേക്രയോളമുള്ള സ്ഥലത്തു് അമ്പതു സെന്റില്‍ ഇന്‍സ്റ്റിറ്റ്യൂട്ടും, ബാക്കി സ്ഥലത്തു് വ്യവസായ എസ്റ്റേറ്റും വരികയാണെങ്കില്‍ അതു് പ്രദേശത്തിന്റെ മുഖച്ഛായ തന്നെ മാറ്റിയേക്കാവുന്ന ഒരു പദ്ധതിയാകുമായിരുന്നു (എന്നെനിക്കു തോന്നുന്നു). ഒരു ശ്രമം കൂടി നടത്തി നോക്കി വിജയിക്കുന്നില്ലെങ്കില്‍, ഞാനും അതങ്ങു വിടും. എല്ലാ ശ്രമങ്ങളും വിജയിക്കണമെന്നില്ലല്ലോ..

Advertisements

6 thoughts on “തളിപ്പറമ്പു് ഡയറി

  1. തളിപ്പറമ്പ് ഇ.ടി.സി യിൽ 2009 ലാണ് ആദ്യം പോയത്.പിന്നീട് ഈ വർഷം മെയിലും .ജീർണ്ണാവസ്ഥയിലുള്ള ട്രൈനിംഗ് സെന്ററാണ് .26 മുതൽ 28 വരെ എനിക്കും ട്രൈനിംഗ് ഉണ്ട്.
    അവിടെ പ്രസിദ്ധമായ മറ്റൊരു ക്ഷേത്രം കൂടിയുണ്ട്. തൃഛമ്പരം.

ഒരു മറുപടി കൊടുക്കുക

Fill in your details below or click an icon to log in:

WordPress.com Logo

You are commenting using your WordPress.com account. Log Out /  മാറ്റുക )

Google+ photo

You are commenting using your Google+ account. Log Out /  മാറ്റുക )

Twitter picture

You are commenting using your Twitter account. Log Out /  മാറ്റുക )

Facebook photo

You are commenting using your Facebook account. Log Out /  മാറ്റുക )